मिलेनियम च्यालेन्ज कर्पोरेसन (एमसीसी) सँगको सम्झौताको संसदीय अनुमोदन र व्याख्यात्मक घोषणालाई अमेरिकाले स्वीकार गरेकोबारे सत्तारूढ गठबन्धनको बैठकमा समीक्षा भएको छ ।

प्रधानमन्त्री निवास बालुवाटारमा बसेको ४ दलीय सत्तारूढ गठबन्धनका शीर्ष नेताको बैठकमा एमसीसी अनुमोदन र व्याख्यात्मक घोषणालाई अमेरिकाले सहजरूपमा लिएको विश्लेषण भएको बैठकमा सहभागी कांग्रेसका नेता रामचन्द्र पौडेलले लोकान्तरलाई जानकारी गराए ।

प्रधानमन्त्री शेरबहादुर देउवा र अमेरिकी विदेशमन्त्री ब्लिंकेनबीच मंगलवार भएको टेलिफोन संवादमा एमसीसी अनुमोदन भएकोमा खुशी व्यक्त गरेका थिए ।

देउवाले गठबन्धनको बैठकमा अमेरिकाले  जारी गरेको विज्ञप्ति र विदेशमन्त्रीसँग भएको टेलिफोन कुराकानी गठबन्धनका नेताहरूलाई जानकारी गराएका थिए ।

‘अमेरिकाले एमसीसी अनुमोदन र व्याख्यात्मक घोषणालाई सहजरूपमा लिएको विश्लेषण भएको छ,’ पौडेलले भने, ‘व्याख्यात्मक घोषणासहित एमसीसी पारित भएकोमा विस्तृतमा समीक्षा भएको छ ।’

तर बैठकमा एकीकृत समाजवादीका ‘सम्मानित नेता’ झलनाथ खनाल र माओवादी केन्द्रका नेता नारायणकाजी श्रेष्ठ र देव गुरूङले भने एमसीसी अनुमोदनबारे असन्तुष्टि राखेको पौडेलले बताए ।

‘उहाँहरूले एमसीसीमा आफ्ना असन्तुष्टिहरू बाँकी रहेको जानकारी गराउनुभयो तर गम्भीर मतभेद भने अब बाँकी छैन,’ पौडेलले भने ।

प्रधानमन्त्री शेरबहादुर देउवाले बैठकमा सबै नेतालाई एमसीसी अनुमोदनमा सघाएको भन्दै धन्यवाद दिएका  थिए ।