लामो समयपछि संवैधानिक इजलास गठन, नियुक्तिसम्बन्धी मुद्दा पेशी चढेन

सर्वोच्च अदालतमा धेरै लामो समयपछि आज संवैधानिक इजलास गठन भएको छ । सर्वोच्च अदालतका कायममुकायम प्रधान न्यायाधीश दीपककुमार कार्कीको अध्यक्षतामा वरिष्ठतम् न्यायाधीश मीरा खड्का, हरिकृष्ण कार्की, विश्वम्भरप्रसाद श्रेष्ठ र ईश्वर खतिवडासहित ५ जना न्यायाधीश रहेको इजलास गठन गरिएको हो ।

उत्प्रेषण माग गरिएका अन्य ६ वटा मुद्दाको सुनुवाइ आजको संवैधानिक इजलासबाट हुँदैछ । संवैधानिक निकायमा गरिएको नियुक्तिविरुद्धको रिटमाथि आज सुनुवाइ हुनेछैन ।

प्रधानन्यायाधीश चोलेन्द्र शमशेर राणालाई संसद्मा महाभियोगको प्रस्ताव दर्ता भएपछि राणा स्वतः निलम्बनमा परेकाले कायममुकायम प्रधानन्यायाधीश कार्कीको अध्यक्षतामा संवैधानिक इजलास गठन गरिएको हो ।

प्रधानन्यायाधीश राणासँग इजलास शेयर गर्न न्यायाधीशहरू तयार नभएको तथा संवैधानिक निकायमा नियुक्ति सिफारिश गर्ने बेला राणा पनि संवैधानिक परिषद्को सदस्य हुँदा स्वार्थ बाझिएकाले उनीसहितको संवैधानिक इजलास गठन गर्न नहुने भनी विवाद उत्पन्न भएको थियो।

निवेदक समेत रहेका अधिवक्ता ओमप्रकाश अर्यालले प्रधानन्यायाधीश राणाको स्वार्थ बाझिएको मुद्दा भएकाले इजलासमा बस्न नहुने भन्दै प्रश्न उठाएका थिए ।

त्यसपछि राणाले आफू इजलास गठन हुने दिन बिदामा बस्ने भनेर मौखिक रूपमा इजालसमा जवाफ दिएका थिए ।

त्यसपछि फेरि प्रधानन्यायाधीश बेगरको संवैधानिक  इजलास गठन नै हुन नसक्ने भन्दै राणाकै अध्यक्षतामा संवैधानिक इजलास गठन हुनुपर्ने भन्दै अधिवक्ता गणेश रेग्मी र अधिवक्ता दीपक मिश्रले अर्को रिट निवेदन दर्ता गरेका थिए ।  

उक्त रिटमाथि न्यायाधीश हरिप्रसाद फुयाँलको एकल इजलासले संवैधानिक इजलासमा भइरहेको सुनुवाइलाई रिटको टुंगो नलागेसम्म सुनुवाइ अगाडि नबढाउन अन्तरिम आदेश जारी गरेको थियो।

त्यसपछि झन् विवाद उत्पन्न भएको थियो।