राष्ट्रिय ध्वजाबाहक नेपाल वायुसेवा निगम (नेपाल एयरलाइन्स) ले कोभिड–१९ महामारीका कारण उडान स्थगित भएका गन्तव्यमा धमाधम उडान विस्तार गरिरहेको छ ।
    
महामारीको जोखिम कम भएसँगै सबैजसो क्षेत्र सहज बनेपछि नेपाल एयरलाइन्सले महामारीअघि उडान सेवा दिइरहेका गन्तव्यमा पुनः उडान शुरू गरेको हो ।

नेपाल एयरलाइन्सले २ वर्षको अन्तरालपछि भारतको मुम्बई र बैङ्लुरुमा पुनः उडान गर्ने घोषणा गरिसकेको छ ।

निगमले आगामी मार्च २१ देखि बैङ्लुरु र मार्च २९ तारिखदेखि मुम्बईमा उडान गर्ने तयारी गरेको छ । 

बैङ्लुरुमा हप्ताको मंगलवार, बिहीवार र शनिवार उडान सञ्चालन हुनेछ भने मुम्बईमा बुधवार, शुक्रवार र आइतवार उडान गरिनेछ ।

महामारीको असहज अवस्थामा पनि नियमित उडान भइरहेको भारतको नयाँदिल्ली गन्तव्यमा पनि गत फागुन ३० गतेदेखि दैनिक २ उडान भइरहेका छन् । भारतले आफ्ना सबै प्रकारका व्यावसायिक उडान खुला गरेसँगै नेपाल एयरलाइन्सले दिल्लीमा दैनिक २ उडान गरिरहेको हो ।