स्थानीय आवश्यकताअनुसार चुनावी गठबन्धन गर्ने कांग्रेसको निर्णय

सरकारको नेतृत्वकर्ता दल नेपाली कांग्रेसले स्थानीय तहको निर्वाचनमा चुनावी तालमेल गर्ने निर्णय गरेको छ ।

शुक्रवार शुरु भई मगंलवार काठमाडौंमा सम्पन्न केन्द्रीय समिति बैठकले चुनावी तालमेल गर्ने निर्णय गरेको हो ।

केन्द्रीय सदस्यहरुको सुझावको आधारमा कांग्रेसले चुनावी तालमेलको निर्णय गरेको हो । 

कांग्रेस प्रवक्ता डा. प्रकाशशरण महतले सर्वसम्मतिबाट स्थानीय आवश्यकता र अवस्थाअनुसार चुनावी तालमेल गर्ने निर्णय गरेको जानकारी दिए ।

बाहिर मिडियामा आएजस्तो चुनावी गठबन्धनबारे पार्टीमा कुनै विवाद नभएको र सर्वसम्मतिबाट तालमेलको निर्णय गरिएको उनले दाबी गरे । 

संविधान निर्माण, कार्यान्वयन र रक्षाको सन्दर्भमा नेतृत्वदायी भूमिका खेलेको र देश विकासमा गरिएको नेतृत्वदायी भूमिकाका कारण स्थानीय निर्वाचनमा बहुमत स्थानमा जित्ने निष्कर्ष कांग्रेसले निकालेको छ।