नेकपा एमालेका उपाध्यक्ष तथा पूर्व अर्थमन्त्री विष्णु पौडेलले सामर्थ्य नभएका दलहरूले चुनावी गठबन्धन गर्ने बताएका छन् ।

एमालेविरुद्ध गठबन्धन गरेका दलहरूले एक्लै चुनावमा जान सक्ने सामर्थ्य नभएको उनले बताए ।

एमालेलाई हराउन जतिसुकै गठबन्धन गरे पनि त्यसको असर नपर्ने उनले दाबी गरे । 

बुटवल उपमहानगरपालिका–९ मा बुधवार एमालेको स्थानीय निर्वाचन प्रचारप्रसार तथा जनसम्पर्क कार्यालयको उद्घाटन गर्दै उनले आफ्नो सरकारको पालामा लिइएका विकास निर्माणका काम देखेर नै जनताले मतदान गर्ने उल्लेख गरे ।

पूर्व अर्थमन्त्री समेत रहेका पौडेलले आफू सरकारमा हुँदा ल्याइएका विकास निर्माणका ठूला–ठूला योजनालाई हालको सरकारले चासो नदिएको आरोप लगाए ।

एमालेले आफ्नो पालामा गरेका विकास र एमालेप्रतिको जनलहरबाट गठबन्धनका दल अत्तालिएका उनले बताए । आगामी वैशाख ३० गते हुने निर्वाचनमा जतिसुकै दलहरूले गठबन्धन गरेर एमालेविरुद्ध लागे पनि फरक नपर्ने उल्लेख गरे ।

निर्वाचनमा एमालेको बहुमत आउने पक्का भएको पौडेलले बताए ।

कार्यक्रममा बोल्दै एमाले पोलिटब्यूरो सदस्य लिला गिरीले आगामी निर्वाचनमा एमालेको जीत सुनिश्चित भएका कारण ढुक्क भएर प्रचारप्रसारमा लाग्न नेता कार्यकर्तालाई आग्रह गरेका छन् ।