संस्कृति, पर्यटन तथा नागरिक उड्यन मन्त्री प्रेम आलेले नेकपा विभाजन गर्नेलाई जनताले दण्डित गर्ने बेला आएको बताएका छन् । 

विराट ट्रेड एक्स्पोको उद्घाटन गर्दै मन्त्री आलेले एमाले अध्यक्ष ओलीका कारण कम्युनिष्ट पार्टी विभाजन भएको भन्दै वैशाख ३० गते हुने चुनावले दण्डित गर्नुपर्ने बताए । 

‘हमे तो अपनो ने लुटा, गैरोमे कहाँ दम था, मेरी किस्ती डुबी थी वहीँ जहाँ कम पानी था’ भन्ने हिन्दी चलचित्रमा प्रयोग भएको सायरी सुनाउँदै मन्त्री आले एमाले अध्यक्ष केपी ओलीमाथि व्यंग्य गरेका हुन् । 

ओलीको नाम नलिइकन उनले दुई ठूला कम्युनिष्ट पार्टी मिलेर बनेको नेकपा तीन चिरामा विभक्त हुनुको कारण को हो भन्ने प्रष्ट भएको बताए । 

यस्तै उनले विराटनगर विमानस्थलको अवस्था सुधार गर्ने र आगामी बजेटबाट माग सम्बोधन हुने प्रतिबद्धतासमेत जनाए ।  

‘बन्दुकबाट निस्केको गोली र प्रेम आलेको बोली उस्तै हो,’ भन्दै आलेले विमानस्थलको सुधारको कामका लागि ढुक्क हुनसमेत आग्रह गरे । 

एक्स्पोमा नेपालसँगै भारत, बंगलादेश र पाकिस्तानका उत्पादनहरूसमेत राखिएको आयोजक मोरङ व्यापार संघले जनाएको छ ।