स्थानीय तह निर्वाचन नजिकिँदै गइरहेका बेला जनप्रतिनिधिहरूले आफूले प्रयोग गर्ने सरकारी गाडी धमाधम फिर्ता गर्न थालेका छन् । चुनावका बेलामा गाडीको दुरुपयोग बढ्न सक्ने भन्दै उनीहरूले सरकारी गाडी फिर्ता गर्न थालेका हुन् । 

मोरङको लेटाङ नगरपालिका मेयर शंकर राई, मोरङकै उर्लाबारीका मेयर खड्गप्रसाद फागो, तेह्रथुमको म्याङलुङ नगरपालिकाका मेयर सञ्जयकुमार तुम्बाहाम्फे, झापाको हल्दीबारी गाउँपालिका अध्यक्ष रवीन्द्रप्रसाद लिङ्देनलागयतका जनप्रतिनिधिले सरकारी गाडी फिर्ता गरेका हुन् । 

सरकारले स्थानीय तहको चुनाव घोषणा गरिसकेको र आफू पार्टीको काममा खटिनुपर्ने भएकाले निर्वाचनमा सरकारी सवारीसाधनको दुरुपयोग नहोस् भनेर गाडी फिर्ता गरेको लेटाङ नगरपालिकाका मेयर राईले बताए । उनी नेपाली कांग्रेस मोरङ क्षेत्र नम्बर १ का  क्षेत्रीय सभापतिसमेत हुन् । 

‘नगरका कामभन्दा बढी अब चुनावी अभियानमा खट्नुपर्छ,’ उनले भने, ‘पार्टीको काममा जाँदा सरकारी गाडी लिएर जान नैतिकताले दिएन ।’ अब चुनावभर भाडाको गाडी प्रयोग गर्ने उनले बताए ।  

यस्तै लेटाङ–४ का वडाध्यक्ष सन्तोष कार्की र ८ का भीमप्रसाद पोखरेलले पनि आफूले प्रयोग गर्दै आएको सरकारी मोटरसाइकल फिर्ता गरेका छन् । 

कार्यपालिका बैठकबाट विकास योजना अघि बढाउन नसकेको भन्दै उर्लाबारीका मेयर फागोले गाडी फिर्ता गरे । 

गत चैत १६ गते उर्लाबारी नगरपालिका कार्यपालिकाको बैठक बसे पनि बैठकमा प्रस्तुत भएका प्रस्ताव अघि बढाउन नेकपा एमालेबाट निर्वाचित उपमेयर लक्ष्मीदेवी भण्डारीसहित बहुमतप्राप्त कार्यपालिका सदस्यहरू नमानेकाले योजनाको काम रोकिएको मेयर फागोको आरोप छ । 

चुनावको समयमा सरकारी सम्पत्तिको दुरुपयोग नहोस् भनेर गाडी फिर्ता गरेको म्याङलुङ नगरपालिकाका मेयर तुम्बाहाम्फे बताउँछन् । 

यता नागरिक समाजका अगुवाहरू  भने मेयरहरूले चुनावको मुखमा सरकारी सेवा सुविधा फिर्ता गर्नुको कुनै अर्थ नरहेको बताएका छन् । भ्रष्टाचारविरोधी अभियान मोरङका अध्यक्ष दिनेश श्रेष्ठले आफ्नो कार्यकालमा उल्लेखनीय काम गर्न नसकेका जनप्रतिनिधिहरूले चुनावमा आफ्नो माहोल बनाउन ‘नौटंकी’ गरेको आरोप लगाए ।