पोखरा महानगरको मेयरका लागि भइरहेको मतगणनामा सत्ता गठबन्धनका साझा उम्मेदवार धनराज आचार्यले मतान्तर फराकिलो बनाउँदै लगेका छन् । 

बुधवार बिहानसम्मको मतगणनामा नेकपा एसका उम्मेदवार आचार्यले १२ हजार ९४५ मतसहित अग्रता कायम गरेका हुन् । 

नेकपा एमालेका कृष्ण थापाले ११ हजार १५० मत प्राप्त गरेका छन् । दुईबीचको मतान्तर १ हजार ८९५ छ । धेरै भोट गन्न बाँकी रहेकोले प्रतिस्पर्धा तीव्र हुने देखिएको छ । 

उपमेयरमा १२ हजार ६९६ भोटसहित नेपाली कांग्रेसकी कोपिला रानाभाट अग्रस्थानमा छन् । एमालेकी मञ्जु गुरुङले १२ हजार ९१ मतसहित दोस्रो स्थानमा प्रतिस्पर्धा गरिरहेकी छन् ।

अन्तर्घातको हल्लाले एमाले गण्डकीमा हलचल ल्याएको छ । धनराजलाई भोट हाल्ने भन्दै एमालेकै नेताहरूबीच भएको टेलिफोन संवादको अडियो बाहिरिएपछि कास्की एमालेभित्र चरम विवाद भएको छ ।