कंगना रनावतको एक्सन फिल्म धाकडको सबभन्दा ठूलो समस्या यसको कमजोर स्क्रिप्ट हो । 

अग्नि (कंगना रनावत) बदला लिन खोजिरहेकी छन् । उनी बालबालिका तस्करी गर्ने रुद्रवीर (अर्जुन रामपाल) को खोजीमा छन् । रुद्रवीर लामो समयदेखि सार्वजनिक भएका छैनन् । 

फ्ल्याशब्याकमा रुद्रवीर र उसकी प्रेमिका रोहिणी (दिव्या दत्ता) को कथा आउँछ । उनीहरू कसरी कुपात्र बन्न पुगे भन्ने कुरा खुल्दै जान्छ । अग्निले उनीहरूलाई खोजेर रोक्ने अनि आफ्नै विगतसँग पनि लड्ने जिम्मेवारी पाएकी हुन्छिन् । उनी यसमा सफल हुन्छिन् त ?

रजनीश राजी गान्धी, चिन्तन गान्धी र रिनिश रवीन्द्रको कथा फिल्मका केही पक्षमा मात्र ध्यान दिएकाले कमजोर छ । यस फिल्मलाई ‘झिल्के बोक्रो, भित्र खोक्रो’ भन्न मिल्छ । फिल्मको एक्सन तारिफयोग्य छ तर कथाले खासै तान्दैन । 

अग्निको प्रतिशोध उनका मातापितासँग जोडिएको छ । यी सबैमा बालबालिका तस्करी गर्ने समूह जोडिएको छ । अनि एक वरिष्ठ अधिकारीले अग्निलाई मिसन पूरा गनै सहायता गरिरहेका छन् । यस्तो कथा पहिले कतै सुन्नुभएको थियो ? अवश्य पनि । 

टेचुओ नागाताको सिनेमाटोग्राफी राम्रो छ । कुनै कुनै शटहरू गजब देखिन्छन् तर तिनले रहस्य निर्माणमा योगदान गर्दैनन् । 

कंगनाले फिल्ममा शारीरिक परिश्रम त राम्रै गरेकी छन् तर उनको पात्रले दर्शकलाई खासै तान्दैन । उनले यसभन्दा राम्रा फिल्महरू पहिल्यै गरिसकेकी छन् ।

अर्जुन रामपाल र दिव्या दत्ताले निकै मेहनत गरेका छन् तर त्यसको केही अर्थ छैन । सही स्क्रिप्ट भएको फिल्ममा उनीहरूको यो मेहनत सार्थक हुन्थ्यो । ‘साइको जोडी’का रूपमा उनीहरू स्मरणीय बन्न सकेका छैनन् । शाश्वता चटर्जी पनि फिल्ममा खेर फालिएकी छन् । 

निर्देशक रजनीश घईले कंगनाको बहादुरीलाई सेलिब्रेट गर्नका लागि फिल्म त बनाए तर रद्दी स्क्रिप्टमा काम गरेकाले फिल्म प्रशंसायोग्य बन्न सकेन । 

कंगनाको करीयरमा बिर्सनलायक फिल्मको सूचीमा धाकड जोडिन पुगेको छ ।

कोइमोइ डट्कममा प्रकाशित उमेश पुनवानीको समीक्षा

फिल्म  :धाकड

कलाकार :कंगना रनावत, अर्जुन रामपाल, दिव्या दत्ता, शाश्वता चटर्जी

निर्देशक  :रजनीश राजी घई

विधा : एक्सन ड्रामा

अवधि : २ घन्टा १५ मिनेट

रेटिङ : ५ मा १ तारा