नेपालमा पहिलो पटक संवादसहित गीति चलचित्र निर्माण हुने भएको छ । 

देवेन्द्र पाण्डेको निर्देशनमा ‘मानिस ठूलो दिलले हुन्छ’ नाममा गीति चलचित्र बन्न लागेको हो । 

चलचित्रको मंगलबार राजधानीमा एक कार्यक्रमकाबीच निर्माण घोषणा गरिएको थियो ।

बुधवारबाट चलचित्रको छायाँकन शुरू भएको छ । 

सौरपानी मिडिया प्रा.लि.को ब्यानरमा निर्माण हुने चलचित्रमा अबिनास न्यौपाने, श्रेया कार्की, मोहन निरौला, उत्तम केसी, सरु सुनार, शुभम् आचार्य, सविना न्यौपाने लगायतको अभिनय रहनेछ ।

चलचित्रलाई मणि नेपाली पनेरुले निर्माण गर्नेछन् ।

 उनले लेखेको ६ वटा लोकगीतमा चलचित्र निर्माण हुन लागेको हो ।

चलचित्रमा केही प्रतिशत संवाद पनि हुनेछ । क्यानडाको लागि नेपाली साँस्कृतिक दुतसमेत रहेका पूर्ण नेपालीको एकल संगीतमा रहेका चलचित्रका गीतहरुमा राजु परियार, तुलसी पराजुली, देवी घर्ती, निशा देशार, धर्मेन्द्र सेवान लगायतका गायक/गायिकाहरुको स्वर रहने छ ।

निर्माता पनेरुले आफूले व्यवसायिक उद्देश्य नबोकी चलचित्र निर्माण गर्न लागेको जानकारी दिए ।

'फरक फरक शैलीका लोकगीतमार्फत चलचित्रमा कथा भनिनेछ । यसलाई आधुनिक मुना मदन पनि भन्न सकिन्छ,’उनले भने ‘तर यो सुखान्त मुना मदन हुनेछ । यो चलचित्रले समाजलाई सकारात्मक सन्देश दिनेमा विश्वस्त छु ।’

भिन्न जातीका दुई केटा–केटीको प्रेमकथामा चलचित्र आधारित हुने उनले जानकारी दिए ।

यसअघि दुई चलचित्रको निर्देशक गरिसकेका देवेन्द्र पाण्डेले आफूले यसअघि गरेका चलचित्रभन्दा ‘मानिस ठूलो दिलले हुन्छ’ भिन्न रहने दाबी गरे ।

सामाजिक विषयवस्तुमा आधारित भएर चलचित्र बन्ने उनको भनाई छ । गीतको माध्यमबाट समाजलाई सन्देश दिने उद्देश्यले चलचित्र बनाउन लागको उनी बताउँछन् । उनले यसअघि दर्जनौं म्यूजिक भिडियोको निर्देशन गरिसकेका छन् ।

चलचित्रको लम्बाई एक घन्टाभन्दा लामो हुने बताइएको छ । सम्भवतः संवादसहित यो लम्बाईमा यसअघि गीति चलचित्र निर्माण भएका छैनन् । 

करीब १५ दिन छायांकन हुने चलचित्रलाई उत्सव दाहालले खिच्नेछन् भने  विकास दाहालले सम्पादन गर्नेछन् । 

चलचित्र निर्माण भएपछि विभिन्न ठाउँमा च्यारिटीसहित हलमा रिलीज गर्ने निर्माण टिमको लक्ष्य छ ।