तारा एयरले आफ्नो हराइरहेको विमान मुस्ताङको थासाङ गाउँपालिका वडा नम्बर २ को सानुसरे भिरमा दुर्घटनाग्रस्त अवस्थामा फेला परेको पुष्टि गरेको छ । 

सोमवार बिहान प्रेस विज्ञप्ति जारी गर्दै एयरले हराइरहेको विमान दुर्घटनाग्रस्त अवस्थामा फेला परेको जनाएको हो ।

आइतवार बिहान पोखराबाट जोमसोमतर्फ बिहान ९ः५५ बजे उडेको तारा एयरको ९एन–एईटी, डीएचसी–६ ट्वीटअटर विमान अन्तिम पटक आइतवार बिहान १० बजेर ७ मितनेटमा घोडेपानीबाट सम्पर्कमा आएपश्चात सम्पर्कविहिन भएको थियो । 

प्रतिकुल मौसम र जटिल भूगोलका बाबजुद पनि नेपाल नागरिक उड्डयन प्राधिकरण, खोज तथा उद्धार समन्वय केन्द्रमार्फत आज बिहानैदेखि हवाई तथा स्थलमार्गबाट खोजी गर्दा उक्त दुर्घटनास्थल फेला परेको तारा एयरले जनाएको छ । 

अहिले उद्धारकर्मीहरू दुर्घटनास्थलमा पुगी उद्धार कार्य जारी रहेको समेत तारा एयरले जनाएको छ ।