सांसद डा. भीम रावलले देश आर्थिक संकटमा परेका बेलामा अध्ययन नगरिकन बजेट आएको र कार्यान्वयनमा कठिनाइ हुने बताएका छन् ।

प्रतिनिधि सभाको बिहीवारको बैठकमा सरकारले आर्थिक वर्ष २०७९/८० को राजस्व र व्ययको वार्षिक अनुमान (बजेट) माथिको सैद्धान्तिक छलफलका विषयमा उनले बजेटले समाजवादोन्मुख अर्थतन्त्रको व्यवस्थालाई अवलम्बन गर्न नसकेको बताए ।

सांसद रावलले नेपाल पनि आन्तारिक र बाह्य ऋणको चपेटामा पर्न सक्ने कुरा आइरहेका अवस्थामा बजेटले त्यो कुरालाई ध्यान दिन नसकेको सुझाव दिए । सांसद रावलले सगरमाथासम्म २ घण्टामा पुग्ने द्रूतमार्ग बनाउने, काठमाडौंबाट चितवन १ घण्टामा पुग्ने द्रूतमार्ग बनाउने पनि बजेटको सस्तो लोकप्रियता भएको धारणा राखे ।

प्रतिनिधि सभाको आर्थिक वर्ष २०७९/८० को राजस्व र व्ययको वार्षिक अनुमान (बजेट) माथि सैद्धान्तिक छलफल सकिएको छ । छलफलमा उठेका प्रश्नको जवाफ शुक्रवार अर्थमन्त्रीले दिने कार्यसूची रहेको छ ।
     
बैठकमा सभामुख अग्निप्रसाद सापकोटाले आर्थिक वर्ष २०७९/८० को राजस्व र व्ययको वार्षिक अनुमान (बजेट) माथिको सैद्धान्तिक छलफल सकिएको र अर्थमन्त्रीले सो बारेमा उठेका सवालको जवाफ यही जेठ २० गते बस्ने बैठकमा दिने जानकारी गराए ।

प्रतिनिधि सभाको अर्को बैठक जेठ २० गते ११ बजे बस्नेछ ।