काठमाडौंको फोहर व्यवस्थापनका लागि प्रधानमन्त्रीले विशेष पहल लिनुपर्छ : गगन थापा

नेपाली कांग्रेसका सांसद गगनकुमार थापाले काठमाडौं महानगरपालिकाको फोहरमुक्त काठमाडौं बनाउने अभियानलाई सक्रिय रूपमा साथ दिन सम्पूर्ण नगरवासीलाई आग्रह गरेका छन् ।
 
प्रतिनिधि सभाको बुधवारको बैठकको शून्य समयमा बोल्दै उनले फोहर व्यवस्थापनमा कानूनी अड्चन फुकाउन प्रधानमन्त्रीले नै विशेष पहल लिनुपर्ने खाँचो औंल्याए ।

कांग्रेसका महामन्त्री समेत रहेका सांसद थापाले भने, ‘काठमाडौंको फोहर व्यवस्थापनमा शहरी विकास मन्त्रालय र काठमाडौं महानगरपालिकाले गरिरहेको काममा मद्दत गर्नु हामी सबैको कर्तव्य हो । कतिपय कुरा दुईटा निकायले चाहेर मात्रै गर्न सम्भव छैन । स्रोतसाधन र कानून नियमको गाँठो फुकाउन प्रधानमन्त्रीज्यूले नै विशेष पहल लिन आग्रह गर्दछु ।’

सरकारले आफ्नो कर्तव्य पूरा गरेसँगै नगरवासीले पनि महानगरपालिकाको आह्वानबमोजिम स्रोतमा नै कुहिने र नकुहिने फोहर छुट्याएर राख्नुपर्ने सांसद थापाको भनाइ छ ।

फोहरमुक्त काठमाडौं अभियानलाई सफल बनाउन महानगरसँग जोडिएका अन्य नगरपालिका र सम्पूर्ण वडाहरूले संघसंस्थाको साथमा काम अघि बढाउन पनि आग्रह गरेका छन् ।