प्रतिनिधि सभाको बैठकले कृषकलाई मल उपलब्ध गराउन सम्भाव्य सबै उपाय अवलम्बन गर्न सरकारलाई निर्देशन दिएको छ । 

सोमवारको प्रतिनिधि सभा बैठकमा एमालेका सांसद विशाल भट्टराईले अत्यन्त जरुरी सार्वजनिक महत्त्वको स्थगन प्रस्ताव दर्ता गरेपछि उक्त प्रस्तावमा छलफल भएको थियो । 

खेती लगाउने बेलामा कृषकले मल नपाएको र कृषकलाई मल उपलब्ध नहुँदासम्म संसद् बैठक स्थगित हुनुपर्ने प्रस्ताव भट्टराईले गरेका थिए । 

उक्त प्रस्तावको छलफलमा ४८ जना सांसदमा भाग लिएका थिए । छलफलपछि संसदले विशेष प्रस्ताव पारित गर्दै मल आपूर्तिका लागि सबै प्रयास गर्न सरकारलाई निर्देशन दिएको हो । 

संसदमा विशेष प्रस्ताव प्रस्तुत गर्दै सभामुख अग्नि सापकोटाले भने, ‘रासायनिक मल कृषि उत्पादन वृद्धिका लागि अत्यावश्यक रहेको र हाल प्रमुख बालीको रुपमा रहेको धान बाली लगाउने समयमा समेत रासायनिक मल उपलब्ध नभएको विषयमा यस सदनको गम्भीर ध्यानाकर्षण भएको छ ।’

संसद पारित गरेको विशेष प्रस्तावमा भनिएको छ, ‘कुल ग्रार्हस्थ्य उत्पादनमा २५ प्रतिशत योगदान दिने कृषि क्षेत्रका समस्या समाधान गर्ने कार्यलाई प्राथमिकता दिँदै अत्यावश्यक रासायनिक मल कृषकलाई सहजरुपमा उपलब्ध गराउनका लागि सम्भाव्य सबै उपाय अवलम्बन गरी कार्य सम्पादन गर्न प्रतिनिधि सभाको यो बैठक नेपाल सरकारलाई निर्देश गर्दछ ।’

त्यसअघिको छलफलमा सांसदहरूले तेस्रो देशबाट एयरलिफ्ट गरेर भए पनि रासायनिक मल ल्याउनुपर्ने माग गरेका थिए । 

नेपाल मजदुर किसान पार्टीका सांसद सुनिल प्रजापतिले भारतसँग भरपर्दा कृषकले मल नपाएको र तेस्रो देशबाट हवाई जहाजमार्फत मल ल्याउने व्यवस्था मिलाउनुपर्ने बताएका थिए । 

भारतबाहेक तेस्रो देशबाट मल ल्याउनको लागि विभिन्न देशमा पत्राचार गरिएको भए पनि सकारात्मक जवाफ नआएको कृषि मन्त्री महेन्द्र राय यादवले संसदमा बताएका थिए ।