रवि लामिछानेका दाइ हरिशरणले पनि प्रतिनिधि सभा सदस्यमा स्वतन्त्र उम्मेदवारी घोषणा गरेका छन् । हरिशरणले काठमाडौं–३ बाट उम्मेदवारी दिने घोषणा गरेका हुन् । 

रविले पनि प्रतिनिधि सभा सदस्यमा उम्मेदवारी दर्ता गर्ने घोषणा गरेका छन् । उनले पनि सोही क्षेत्रबाट उम्मेदवारी दिने रुचि देखाएका छन् । 

पूर्व सञ्चारकर्मीसमेत रहेका हरिशरणले स्वतन्त्र राष्ट्रिय सञ्जाल निर्माणको अभियान जारी रहेको बताएका छन् । ‘देशैभरका स्वतन्त्र उम्मेदवारबीच न्यूनतम राष्ट्रिय मुद्दामा समझदारी कायम गरी निर्वाचन क्षेत्र कायम गरिनेछ,’ उनले फेसबुकमा लेखेका छन्, ‘मेरो हकमा काठमाडौं-३ बाट उम्मेदवारी दिने समझदारी भएको सबैमा जानकारी गराउँदछु ।’

त्यस्तै उनले काठमाडौं-१ मा पुकार बम, ५ मा रन्जु दर्शना र ८ मा सुमन सायमीले स्वतन्त्र प्रतिस्पर्धा गर्ने सम्भावना रहेको बताए । 

यस्तै काठमाडौं बाहिर विश्व साइकल यात्री पुष्कर शाहले दोलखाबाट प्रतिस्पर्धा गर्ने उनको भनाइ छ । 

साथै असार १७ र १८ गते राष्ट्रिय भेला गर्ने हरिशरणले जानकारी दिएका छन् ।