प्रमुख प्रतिपक्षी दल नेकपा एमालेले अमेरिकाको राज्य साझेदारी कार्यक्रम (एसपीपी) को सदस्यता रद्द गर्ने या कार्यक्रममा मात्र सहभागी नहुने भन्ने विषयमा प्रधानमन्त्रीले सदनमा जवाफ दिनुपर्ने माग गरेको छ ।

प्रतिनिधि सभाको मंगलवार बसेको बैठकको विशेष समयमा एमाले सांसद भीम रावलले एसपीपीबाट सरकार पछि हटे पनि सदस्यता रद्द गर्ने हो कि कार्यक्रममा मात्र सहभागी नहुने भन्ने विषयमा सरकारको जवाफ माग गरेका हुन् ।

‘मन्त्रिपरिषद्ले एसपीपीबाट पछि हट्ने निर्णय गरेको कुरा सुन्नमा आएको छ, सदस्यता रद्द गर्छाै भनेको हो कि कार्यक्रममा मात्र सहभागी नहुने भनेका हौं ? प्रधानमन्त्रीले सदनमा आएर भन्नुपर्छ,’ रावलले भने । 

रावलले एसपीपीमा हस्ताक्षर गर्न कुन प्रधानमन्त्रीले तत्कालीन प्रधानसेनापतिलाई निर्देशन दिएको भन्नेबारे पनि देउवाले सदनमा आएर जवाफ दिनुपर्ने बताए । ‘सत्तापक्षबाट पनि औंला ठड्याउने काम भएको छ, तत्कालीन प्रधानसेनापतिलाई एसपीपीलाई पत्र पठाउन आदेश दिने सुशील कोइराला हुनुहुन्थ्यो कि केपी ओली हुनुहुन्थ्यो ? प्रम आएर तथ्यसहित जानकारी गराउनुस्,’ रावलले भने ।

एमाले सांसद रावलले प्रतिनिधि सभाको बैठक छाडेर गैरआवासीय नेपालीको सेमिनार तथा अन्तर्राष्ट्रिय सम्बन्ध समितिको बैठक छाडेर ५ दलीय गठबन्धनको बैठकमा सहभागी भएको भन्दै देउवाको आलोचना गरेका छन् ।