सूचना नदिँदा १० हजार जरिबाना

राष्ट्रिय सूचना आयोगले माग गरिएबमोजिमको सूचना उपलब्ध नगराउने रौतहट राजपुर नगरपालिकाका कार्यलय प्रमुख तथा सूचना अधिकारीलाई जरिबानाको फैसला सुनाएको छ । 

राजपुर –१ का एक्रा मुलहकले माग गरेको सूचना उपलब्ध नगराएको कसूरमा नगरपालिकाका कार्यालय प्रमुख बैंजु ठाकुर, कार्यवाहक प्रमुख तथा सूचना आयुक्त कमला ओली थापा र सूचना आयुक्त रत्नप्रसाद मैनालीलाई १० हजार रुपैयाँ जरिबाना गर्ने फैसला गरेको हो । सूचनाको हकसम्बन्धी ऐन, ०६४ को दफा ३२ को उपदफा (१) बमोजिम उनीहरूलाई जरिबाना गर्दै आयोगले माग गरिएको सूचना उपलब्ध गराउन आदेश दिएको छ । 

मुलहकले राजपुर नगरपालिकाको कार्यालयमा कोरोना महामारीका क्रममा नगरपालिकाको क्वारेन्टाइनमा १–९ वडामा रहेको मानिसहरूको संख्या, एक जनाको लागि भएको खर्च र सम्पूर्ण खर्चको विवरण, कम्बल वितरणको संख्या र प्रतिकम्बलको मूल्यदर सम्बन्धी सूचना माग गरेका थिए । नगरपालिकाका कर्मचारीहरुले सूचना उपलब्ध नगराएपछि उनले आयोगसमक्ष पुनरावेदन गरेका थिए । त्यसपछि आयोगले सूचना उपलब्ध गराउन निर्देशन दिँदा पनि नदिएपछि जरिबानाको फैसला सुनाएको हो । 

नेपालको संविधान, ०७२ को धारा २७ मा ‘प्रत्येक नागरिकलाई आफ्नो वा सार्वजनिक सरोकारको कुनै पनि विषयको सूचना माग्ने र पाउने हक हुनेछ’ उल्लेख छ ।