प्रहरी कार्यविधि संसोधन गरेर लेखापालको समयमा अवधि बढाएर ८ वर्ष पुर्‍याइएको छ । 

यसभन्दा अगाडि नियुक्तीको मितिले ६ वर्षसम्म लेखापाल हुन पाउने व्यवस्था रहेकोमा समयावधि बढाएर ८ वर्ष पुर्‍याइएको हो । 

प्रहरी प्रधान कार्यालयका प्रवक्ता प्रहरी वरिष्ठ उपरीक्षक (एसएसपी) विष्णुकुमार केसीका अनुसार कार्यविधि संसोधन भइसकेको छ । तर निर्णय हुन बाँकी रहेको उनले बताए । 

‘पीसीसीबाट पास भएर आइसकेको छ । त्यसलाई निर्णय गर्न मात्रै बाँकी छ,’ एसएसपी केसीले लोकान्तरसँग भने,‘अब निर्णय हुन मात्रै बाँकी हो, १/२ दिनमा निर्णय हुन्छ ।’ 

कार्यविधि संशोधन भएर आएपछि मात्र लेखापालहरूको सरुवा हुने उनले बताए । समयमा नै बजेट आउने भएकाले लेखापालको सरुवा चाँडो गर्दा समस्या नहुने एसएसपी केसीले बताए । 

तर नेपाल प्रहरीका लेखापाल (अकाउन्टटेन्)हरूको सरुवा यो आर्थिक बर्षमा पनि समयमा हुन भने सकेको छैन ।  

सामान्यतया असार मसान्त अगाडि नै लेखापालहरूको सरुवा हुने चलन छ । 

आर्थिक वर्ष समाप्तिसँगै नयाँ आर्थिक वर्षमा कार्यालयहरूको लेखा व्यवस्थापनका लागि साउन १ गतेदेखि हाजिर हुने गरि सरुवा हुँदै आएको थियो । 

तर यो वर्ष पनि समयमा लेखापालहरूको सरुवा हुने छाँटकाँट देखिएको छैन । 

अघिल्लो वर्ष सर्वोच्च अदालतले केपी ओलीको सरकारलाई पदच्यूत गरेर नेपाली काँग्रेसका सभापति शेरबहादुर देउवालाई नयाँ प्रधानमन्त्री नियुक्त गरेपछि सेट भइसकेको लेखापालहरूको सरुवा ५ महिना पछाडि भएको थियो । 

तत्कालीन आईजीपी शैलेश थापा क्षेत्रीले लेखापाल रहने सबै प्रहरी युनिटहरूमा पत्र लेखेपछि प्रहरीले तलब खाएका थिए । अहिले पनि अघिल्लो वर्षकै अवस्था आएको छ ।  

यो वर्ष भने राजनीतिक पहुँचवाला लेखापालले आफू अनुकुल जानको लागि दबाव दिएपछि लेखापालको सरुवा समयमै हुन नसकेको प्रहरी प्रधान कार्यालय स्रोतले लोकान्तरलाई बतायो ।

अघिल्लो वर्ष कार्यविधि परिर्वतन गरेर लेखापालको सरुवा गर्ने भन्दै लामो समय सरुवा भएको थिएन । 

यसपालि पनि प्रहरी प्रधान कार्यालयले लेखापालहरूको कार्यविधि संसोधन गरेर सरुवा गर्ने भन्दै विलम्ब गरिरहेको छ ।

प्रहरी लेखापालमा ६ वर्ष हुन पाउने व्यवस्था छ । एक जना लेखापाल ६ वर्ष लेखापाल हुन पाउँदैन । तिनीहरू स्वतः लेखापालबाट मुक्त हुने व्यवस्था छ र उनीहरूको ठाउँमा नयाँ तालिम लिएका लेखापालहरू आउने गर्दछन् ।  

पछिल्लो समयमा प्रहरीमा राजनीतिक हस्तक्षेप भएको भन्दै आलोचना बढेको छ ।