ई–स्पोर्टस्को बजेटबारे मेयर बालेनको जवाफ : पत्रकारिताको मर्यादाभित्र बसेर कार्य गर्नू

काठमाडौं महानगरपालिकाका प्रमुख (मेयर) बालेन्द्र शाह ‘बालेन’ले ई–स्पोर्टस्को बजेटबारे अतिरञ्जित र अनैतिक समाचार प्रकाशित भएकोमा आपत्ति जनाएका छन् ।

बिहीवार सामाजिक सञ्जाल फेसबूकमा प्रतिक्रिया जनाउँदै मेयर शाहले पत्रकारिताको मर्यादाभित्र बसेर आफ्नो कार्य गर्न, गराउन अनुरोध गरेका छन् ।

उनले लेखेका छन्, ‘यो विषयलाई लिएर अतिरञ्जित र अनैतिक रूपमा मेरो नाम जोडिएका समाचारको खण्डन गर्दै पत्रकारिताको मर्यादाभित्र बसेर आफ्नो कार्य गर्न, गराउन अनुरोध गर्दछु ।’

शाहले कानूनले तोकिए बमोजिमको प्रक्रिया अपनाएर पारदर्शी किसिमले बजेट कार्यान्वयन हुने जनाएका छन् ।

‘सञ्चारमाध्यम तथा सामाजिक सञ्जालहरूमा उठेको प्रसंगका विषयमा ध्यानाकर्षण भएको छ । ई–स्पोर्टसका लागि छुट्याइएको बजेट कुनै अमुक संस्था वा खेलका लागि होइन । आधुनिक विश्वमा ई–स्पोर्टस खर्बौंको आर्थिक योगदान गर्ने विधा हो । नेपालमा पनि यसको व्यावसायिक पाटो बढ्दैछ भने यही वर्ष हुने एसियाली खेलमा ई–स्पोर्टस पनि समावेश हुनेछ र योग्य रहेमा नेपाली ई–स्पोर्टसका खेलाडीहरूले पनि सहभागी भएर राष्ट्रको गरिमा बढाउन सक्नेछन् । यसलाई व्यवस्थित र सिर्जनशील बनाउनका लागि महानगरले बजेट छुट्याएको हो,’ उनले भनेका छन्, ‘कानूनले तोकिए बमोजिमको प्रक्रिया अपनाएर पारदर्शी किसिमले बजेट कार्यान्वयन हुनेछ । फलानो संस्था वा फलानो खेलका लागि सुनिश्चित गर्ने जस्ता गैरकानूनी र अनैतिक कार्यमा महानगर सामेल हुने छैन ।’