झापाको दमक नगरपालिकाको बजेट पास भएको छ ।

पाँचौंपटक बसेको नगर सभाको बैठकले बजेट पारित गरेको हो ।

चालू आवका लागि १ अर्ब ६३  करोड ४० लाख ४० हजार बराबरको अनुमानित बजेट गत असार १० गते उपमेयर रेगिना भट्टराईले नगर सभामा पेश गरेकी थिइन् ।

त्यसपछि बसेको बैठकमा सहमति जुट्न नसक्दा बजेट पास हुन सकेको थिएन । १० गते पेश भएको बजेट असार २७ गते पास गर्ने गरी बैठक बोलाइएको थियो ।

संविधानले कल्पना नै नगरेको नगरपालिकामा विपक्षीको संसदीय दल गठन गरेर दलका लागि कार्यालय र दलका नेताका लागि गाडी सुविधा समेत माग गर्दै एमालेले बैठकमा नै हल्ला गरेका थिए । हल्लाले बैठक बिथोलिएपछि २९ गते बोलाइएको नगर सभामा एमालेबाट जितेका जनप्रतिनिधिले सहभागी भएनन् ।

साउन ३ गते बोलाइएको नगर सभामा एमालेका जनप्रतिनिधि सहभागी भएका थिएनन् । नगर सभामा बहुमत एमाले जनप्रतिनिधि उपस्थित नभएपछि नगरसभा नै स्थगित गरिएको थियो ।

दमकमा ५८ जनप्रतिनिधि निर्वाचित छन्, जसमा ४५ जना एमालेका छन् भने बाँकी १३ जना गठबन्धनका छन् । तीमध्ये एमालेका विश्वनाथ बराल जिल्ला समन्वय समिति प्रमुखमा निर्वाचित भएका छन् । मेयर थापा राप्रपाका हुन् भने उपमेयर भट्टराई कांग्रेसकी हुन् । 

असार १० गते पेश गरेर असार मसान्तमा स्थानीय तहले बजेट पास गर्नुपर्ने कानूनी बाध्यता रहे पनि एमालेको विरोधका कारण बजेट पास हुन सकेको थिएन । 

स्थानीय तहमा पनि संसदीय अभ्यास थाल्नुपर्ने भन्दै एमालेले आवाज उठाउँदै आएको थियो तर कानूनमा स्थानीय तहमा संसदीय अभ्यासलाई मान्यता दिएको छैन । 

२०७९ सालको निर्वाचनमा एमाले अध्यक्ष केपी शर्मा ओलीको गृहनगरमा एमालेले मेयर/उपमेयर पहिलो पटक हारेको छ । हारेपछि नगरमा एमालेले राजनीति गरेको गठबन्धनबाट जितेका जनप्रतिनिधिको भनाइ छ । 

एमालेबाट निर्वाचित भएका जनप्रतिनिधिले संसदीय अभ्यासको कुरा नउठाएको दाबी गरेका छन् । ‘हामीले पटके कर र करारका कर्मचारीको म्याद थप्नुपर्ने माग राखेर विरोध जनाएका थियौं,’ नेकपा एमालेबाट निर्वाचित भएका दमक नगरपालिका–१ का वडाध्यक्ष हरिप्रसाद न्यौपानेले भने, ‘साउन ७ गते बसेको कार्यपालिका बैठकले हाम्रो माग सम्बोधन गरेको छ ।’