राष्ट्रपतिले सन्देशसहित फिर्ता पठाएको नेपाल नागरिकता (पहिलो संशोधन) विधेयक २०७९ लाई प्रतिनिधि सभाको बुहमतले हुबहुँ पारित गरेको छ ।

प्रतिनिधि सभाको बिहीवारको बैठकमा नागरिकता विधेयकमाथि पक्ष र विपक्षमा मत विभाजन हुँदा विधेयक पुनः बहुमतले पारित भएको सभामुख अग्निप्रसाद सापकोटाले घोषणा गरे ।

बैठकमा उपस्थित १९५ सांसदमध्ये विधेयक पारित गर्ने पक्षमा १३५ र यथास्थितिमा विधेयक पारित गर्न नहुने पक्षमा ६० मत परेको थियो भने मत दिन्न भन्ने पक्षमा कुनै पनि मत परेन ।

प्रमुख प्रतिपक्ष दल नेकपा एमालेका संसदीय दलका प्रमुख सचेतक विशाल भट्टराईले नागरिकता विधेयकमाथि प्रतिनिधि सभामा मतविभाजनको माग गरेपछि मतदान भएको हो । प्रतिनिधिसभाले पहिलोपटक गत साउन १६ गते विधेयक दुवै सदनबाट पारित गरी प्रमाणीकरणका लागि राष्ट्रपतिसमक्ष पठाएको थियो ।

राष्ट्रपतिबाट साउन २९ गते विधेयक प्रतिनिधि सभामा पुनर्विचार गरियोस् भनी फिर्ता भएको थियो । फिर्ता आएको ४ दिनमै हतारहतार बिहीवार विधेयकमाथि छलफल भई पुनः बहुमतले पारित भएको छ ।