राष्ट्रिय प्रजातन्त्र पार्टी (राप्रपा)का प्रवक्ता सगुनसुन्दर लावतीले युवा तरुण बिना देशको विकास र समृद्धि अकल्पनीय रहने बताएका छन् । ‘युवाहरू समाज विकासका अभिन्न साझेदार हुन् । युवाहरूले समाजका सर्वाङ्गीण विकासमा महत्वपूर्ण योगदान पुरूयाइरहेका छन्’, उनले भने, ‘युवा तरुण बिना देश विकास र समृद्धिको कल्पना पनि सकिन्न, यद्यपि वर्तमानका साझेदारलाई भविष्यका कर्णाधार भन्दै युवा भूमिकालाई सीमित राख्ने क्रम जारी छ ।’ 

प्रवासी नेपाली एकता समाज दक्षिण कोरियाले शनिवार आयोजना गरेको अन्तरक्रियालाई जुममार्फत सम्बोधन गर्दै प्रवक्ता लावतीले भने, ‘नेपाल युवाहरूको देश हो । जबसम्म युवा पुस्ताको अकाट्य योगदान स्वीकार गरिन्न, समाज विकासका लक्ष्य प्राप्त कठिन हुनेछ ।’ युवाहरूको अपरिहार्य योगदान र सकारात्मक भूमिकालाई लिएर राप्रपामा कुनै द्विविधा नरहेको उनको भनाइ थियो ।

उनले प्रवासमा रहेका युवाहरूले श्रम गरेर स्वदेश पठाएको विप्रेषणले हिंसात्मक द्वन्द्व र कोभिड महामारीको समयमा नेपाली अर्थतन्त्रलाई जोगाएको दृष्टान्त प्रस्तुत गरे । आगामी मंसिर ४ गते सम्पन्न हुने प्रतिनिधिसभा र प्रदेशसभा निर्वाचनमा प्रवासमा रहेका नेपालीहरूको सहयोग र सद्भावका लागि लावतीले आह्वान गरे ।

जुम अन्तरक्रियामा भाग लिँदै दक्षिण कोरियास्थित युवाहरूले, विदेशमा कार्यरत युवाहरू स्वदेश फर्किएर क्रियाशील हुन कर छुटको व्यवस्था लागू गर्न माग गरे । यसैगरी नेपालमा कलकारखाना र उद्योग स्थापना, रोजगार सिर्जनाका लागि विशेष नीति अख्तियार गरेर युवाहरूलाई घर फर्कन, नेपाली पूँजी स्वदेश फर्काउन राप्रपाले अभियान सञ्चालन गर्नु पर्ने सुझाव दिएका थिए ।

श्रमदानलाई देश विकासको अभिन्न अंग बनाउन, बेथितीको रुपमा रहेको हुण्डी व्यवस्था पूर्ण नियन्त्रण गर्न वक्ताहरूले माग गरे ।