प्रमुख प्रतिपक्षी दल नेकपा एमालेले ४ वटा विषयमा प्रधानमन्त्री शेरबहादुर देउवाको ध्यानाकर्षण गराएको छ ।

एमाले अध्यक्ष केपी शर्मा ओली लगायत एमाले नेताले बुधवार देउवासँग भेट गरी नागरिकता विधेयक लगायत ४ विषयमा ध्यानाकर्षण गराएको हो । 

भेटमा सहभागी एमाले उपाध्यक्ष विष्णु पौडेलले निर्वाचनको निष्पक्षता, नागरिकता विधेयक, संक्रमणकालीन न्याय सम्बन्धी विधेयक र महंगीको विषयमा छलफल भएको जानकारी दिए । 

‘निर्वाचनको मिति घोषणा गर्ने बेला प्रमुख प्रतिपक्षसँग कुरा भएन तर पनि चुनाव घोषणा भएकोमा स्वागत गरेका छौं, चुनावमा सत्ताको दुरुपयोग नहोस् भनेर प्रधानमन्त्रीसँग गम्भीर कुरा गरेका छौं,’ भेटपछि पौडेलले भने । 

नागरिकता विधेयक पुनर्विचारका लागि राष्ट्रपतिले प्रतिनिधि सभालाई फिर्ता पठाएपछि सत्तापक्षले बाहुबली शैली देखाएकोमा एमालेले आपत्ति जनाएको छ ।

‘संविधानले नचिन्ने संसद बाहिरका नेताले राष्ट्रपति विद्या भण्डारीविरुद्ध मसल देखाएर विधेयक पारित गरेकोमा हामीले असहमति जनाएका छौं, राष्ट्रपतिले पुनर्विचार गर्न पठाएपछि किन प्रतिपक्षसँग छलफल गरिएन भनेर सरकारको जवाफ माग्यौं,’ पौडेलले भने । 

तेस्रो विषय संक्रमणकालीन न्याय सम्बन्धी विधेयक अगाडि बढाउँदा पीडितले न्याय पाउने सुनिश्चितताबारे सरकारको ध्यानाकर्षण गराइएको पौडेलले बताए । ‘बेपत्ता छानबिन र सत्य निरुपण विधेयक अगाडि बढाउँदा पीडितले न्याय पाउने कुराको सुनिश्चितता गर्नुस् भनेका छौं,’ पौडेलले भने । 

एमालेले बजारमा भइरहेको महंगीको विषयमा पनि सरकारको ध्यानाकर्षण गराएको छ । ‘बजार महंगीले सर्वसाधारण नागरिकको जीवन कष्टकर भएको विषयमा हामीले प्रभावकारी उपाय अवलम्बन गर्न सरकारको ध्यानाकर्षण गराएका छौं,’ पौडेलले भने । 

एमालेले उठाएका विषयमा आफ्नो ध्यानाकर्षण भएको देउवाले बताएका थिए । उनले महंगी नियन्त्रण गर्न सरकार प्रतिबद्ध रहेको बताए । देउवा र ओलीबीचको भेटमा एमालेबाट उपाध्यक्षद्वय विष्णु पौडेल र सुवासचन्द्र नेम्वाङ तथा कांग्रेसको तर्फबाट सञ्चारमन्त्री समेत रहेका नेता ज्ञानेन्द्रबहादुर कार्की सहभागी थिए ।