प्रमुख प्रतिपक्षी दल नेकपा एमालेले सरकारको नेतृत्व गरिरहेको दल नेपाली कांग्रेसको भ्रातृ संगठन नेविसंघलाई त्रिभुवन विश्वविद्यालयमा संरक्षित गुण्डागर्दी गर्न छुट दिएको भन्दै आपत्ति जनाएको छ । 

सोमवार बसेको प्रतिनिधि सभा बैठकमा विशेष समय लिएर एमाले उपमहासचिव प्रदीप ज्ञवालीले त्रिविमा नेविसंघले गरेको गुण्डागर्दीका सम्बन्धमा सरकारको जवाफ माग गरेका हुन् । 

एमालेले त्रिविमा देखिएको समस्या समाधान नगरे संसद् चल्न नदिने चेतावनी समेत दिएको छ ।

‘त्रिविका कुलपति समेत रहेका प्रधानमन्त्री शेरबहादुर देउवा र गृहमन्त्री वालकृष्ण खाँणले नेविसंघको नेतृत्व गर्नुभएको थियो । पञ्चायतको समयमा उहाँहरूलाई मण्डलेले आक्रमण गरेका थिए,’ ज्ञवालीले भने, ‘नेविसंघलाई अहिले त्यही अवतारमा उतार्न खोजेको हो ?’

ज्ञवालीले त्रिविमा भइरहेको आन्दोलनका सम्बन्धमा कुलपति समेत रहेका प्रधानमन्त्रीको मौनता रहस्यमय रहेको टिप्पणी गरे । 

‘विश्वविद्यालयको कार्यालय बूढानीलकण्ठ लैजान लगिएको हो कि ? यो विषयमा कुलपतिले जवाफ दिनुपर्छ । जवाफ नदिँदासम्म सदनको कारवाही अगाडि बढ्न सक्दैन,’ उनले भने । 

एमालेले संसद्मा रुलिङ गर्न माग गरेपछि सभामुख अग्नि सापकोटाले विश्वविद्यालयको समस्या समाधान गर्न सरकारलाई रुलिङ गरेका छन् ।