अख्तियार दुरुपयोग अनुसन्धान आयोगले उच्च अदालत दिपालयका तत्कालीन रजिष्ट्रार रणबहादुर कटवालविरुद्ध भ्रष्टाचार मुद्दा दर्ता गरेको छ । सार्वजनिक सम्पत्ति हानि–नोक्सानी गरेको भन्दै उनीविरुद्ध ६ लाख १० हजार ९९५ रुपैयाँ बिगो कायम गरी बिहिवार विशेष अदालतमा मुद्दा दर्ता गरिएको हो ।

अख्तियारका प्रवक्ता श्यामप्रसाद भण्डारीका अनुसार आर्थिक वर्ष २०७८/०७९ मा कटवालले आफ्नो पदको दुरुपयोग गरी नक्कली बिल भरपाई खडा गरी नक्कली सम्झौता बनाई अनियमितता गरेको खुलेको हो । आफैँ नक्कली सम्झौता बनाई आफैँ स्वीकृत गरी आफैंले शोधभर्ना लिने, सर्वोच्च अदालतबाट भर्चुअल अनुगमन निरीक्षण भएकोमा दिपायल मुकाममा होटेल खर्च भएको स्वीकृति गरी बिल भरपाई बनाई आफैँले भुक्तानी लिएको अभियोगपत्रमा उल्लेख छ ।

कतिपयमा खर्च शीर्षकमा स्टोरकिपरबाट शोधभर्ना गरी भुक्तानी लिने, व्यवसायीहरूसँग अफिसको हिसाब किताब मिलाउन भनी बिल ल्याई हुँदै नभएको खर्चको नक्कली खरिद देखाउने गरेको अभियोगपत्रमा उल्लेख छ । 

प्रयोगविहीन गाडीको मर्मत गरेको भनी बिलको भुक्तानी लिने, किर्ते गरी मिति सच्याई भ्रमण काजको भुक्तानी लिने लगायतको फर्जी काम कटवालले गर्दै आएको अभियोगपत्रमा उल्लेख छ ।