सत्ता गठबन्धनका शीर्ष नेतासहितको बैठक बालुवाटारमा जारी छ । प्रधानमन्त्रीको सरकारी निवास बालुवाटारमा बसिरहेको बैठकमा आगामी मंसिर ४ गते हुने निर्वाचनमा सिट बाँडफाँटबारे घनिभूत छलफल भइरहेको नेताहरूले बताएका छन् । 

सत्तारूढ गठबन्धनमा रहेका दलहरूले आगामी प्रतिनिधि सभा र प्रदेश सभाको चुनावमा तालमेलको सहमति गरेका छन् । तर, उनीहरूले सिट बाँडफाँट भने गर्न सकेको छैन । 

साउन २० गते सिट बाँडफाँटको लागि कार्यदल बनाएर काम थालेको गठबन्धनले चुनावी तालमेलको गाँठो अझै फुकाउन सकेको छैन । 

बालुवाटार स्रोतका अनुसार, गठबन्धनमा रहेका शीर्ष नेताहरू आज बिहानैदेखि बालुवाटारमा बैठकमा जुटेका छन् । धेरैजसो नेताहरूले त बालुवाटारमै खाना खाएका थिए भने केही नेताहरू आफ्ना निवास पुगेर खाना खाएर बालुवाटार फर्किएका छन् । 

बैठकमा प्रधानमन्त्री तथा नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष प्रचण्ड, एकीकृत समाजवादीका अध्यक्ष माधव नेपाल, जनता समाजवादी पार्टीका अध्यक्ष उपेन्द्र यादवलगायतका शीर्ष नेताहरू सहभागी छन् । त्यसबाहेक गठबन्धनले बनाएको कार्यदलका सदस्यहरू पनि बालुवाटारमै रहेको बालुवाटार स्रोतले बताएको छ ।