लुम्बिनी प्रदेश सरकारले विभिन्न क्षेत्रबाट राष्ट्रलाई योगदान पुर्‍याउने ६१ जनालाई विभिन्न पदकबाट विभूषित गर्ने भएको छ । संविधान दिवसको अवसरमा सोमवार बुटवलमा आयोजित विशेष समारोहमा प्रदेश पदकबाट विभूषित हुने व्यक्तिहरूको नामावली घोषणा गरिएको हो । 

प्रदेश सरकारले हरेक वर्ष संविधान दिवसका अवसरमा पदक पाउनेहरुको नाम सार्वजनिक गरी फागुन ३ गते प्रदेश स्थापना दिवसमा पदक वितरण गर्दै आएको छ । 

आन्तरिक मामिला, कानून तथा सञ्चारमन्त्री तिलकराम शर्माको संयोजकत्वमा गठित ७ सदस्यीय समितिले पदक पाउनेहरूको नाम छनोट गरी सरकारलाई सिफारिस गरेको थियो । 

प्रदेश राजपत्रमा प्रकाशित सूचनाअनुसार लुम्बिनी प्रदेश सरकारले प्रदेश प्रमुख जनसेवा पदक तृतीय र मुख्यमन्त्री प्रज्ज्वलदीप पदक द्वितीय २/२ जनालाई प्रदान गरेको छ । भने, प्रदेश सेवा समर्पण पदक प्रथम एक जनालाई प्रदान गरेको छ । त्यस्तै, प्रदेश सेवा समर्पण पदक द्वितीय ९ जनालाई, प्रदेश सेवा समर्पण पदक तृतीय एक जनालाई, उजिरसिंह दीप पदक द्वितीय ४ जनालाई र उजिरसिंह दीप पदक तृतीय चार जनालाई प्रदान गरेको छ ।

त्यसैगरी समाजसेवा श्री पदक द्वितीयबाट ६ जना र समाजसेवा श्री पदक तृतीयबाट एक जनालाई प्रदान गरेको छ । प्रदेश रत्न पदक प्रथम दुई जनालाई, प्रदेश रत्न पदक द्वितीय १२ जनालाई, प्रदेश रत्न पदक तृतीय ६ जनालाई प्रदान गरेको छ ।

त्यस्तै, प्रजापति गौतम पदक द्वितीय र तृतीयबाट १/१ जना, दंगिशरण बलिहाङ पदक द्वितीयबाट एक जना तथा दंगिशरण बलिहाङ पदक तृतीयबाट ४ जना गरी ६१ जनालाई विभूषित गरिएको लुम्बिनी प्रदेशका आन्तरिक मामिला, कानून तथा सञ्चार मन्त्रालयका सचिव कोमलप्रसाद धमलाले जानकारी दिए ।

कार्यक्रममा बोल्दै लुम्बिनी प्रदेशका मुख्यमन्त्री कुल प्रसाद केसीले संघीय लोकतान्त्रिक गणतन्त्र नेपालको संविधान २०७२ त्याग तपस्या र बलिदानबाट मात्रै प्राप्त भएको उल्लेख गर्दै संविधान प्राप्तिमा लुम्बिनी प्रदेश प्रमुख हकदार प्रदेश भएको बताए । 

मुख्यमन्त्री केसीले संविधानको कार्यान्वयन र रक्षाका लागि परिवर्तनकारी र गणतन्त्र पक्षधरहरू नै एकीकृत र केन्द्रिकृत गर्नुपर्ने बताए । 

संविधान दिवसमा लुम्बिनी प्रदेशमा प्रदेश प्रमुख अमिक शेरचन, सभामुख पूर्णबहादुर घर्ती, उपसभामुख कृष्णी थारुलगायत मन्त्री, प्रमुख सचिव, सचिवलगायत विभिन्न सरोकारवाला निकायको सहभागिता रहेको थियो ।