एकेडेमी अफ मोसन पिक्चर आटर्स एण्ड साइन्सेसद्वारा सन् २०२३ मा घोषणा गरिने ९५औँ एकेडेमी अवार्ड (ओस्कार अवार्ड)का लागि नेपालबाट फिचर फिल्म ‘ऐना झ्यालको पुतली’ सिफारिस भएको छ । 

प्रतिस्पर्धामा रहेका अन्य दुई चलचित्र ‘प्रकाश’ र ‘राधा’लाई पछि पार्दै ‘ऐना झ्यालको पुतली’ सिफारिस भएको हो । नेपालको अन्तर्राष्ट्रिय फिचर चलचित्र छनोट समितिले सोमवार ‘ऐना झ्यालको पुतली’ सिफारिस गरेको हो । 

प्राविधिक पक्ष, कथ्यको प्रस्तुति, चरित्रहरूको भावनात्मक विश्लेषण पक्ष तथा प्रस्तुतिको कलात्मक बनोट आदिसमेतलाई दृष्टिगत गरी उक्त अवार्डमा नेपालको प्रतियोगीका रूपमा सामेल गराउनका निम्ति ‘ऐना झ्यालको पुतली’लाई छनोट गरिएको समितिले जनाएको छ । 

‘ऐना झ्यालको पुतली’लाई सुजित बिडारीले लेखन तथा निर्देशन गरेका हुन् । चलचित्रमा कञ्चन चिमरिया, दिनेश खत्री, सिरु विष्टलगायतको अभिनय छ । चलचित्र अहिले दोस्रो सातामा प्रदर्शनरत छ ।