प्रदर्शनको तयारीमा रहेको चलचित्र ‘प्रेमगीत ३’ विवादमा परेको छ । चलचित्र विकास बोर्ड र ‘प्रेमगीत ३’ टिम दुई पक्षमा देखिएका छन् । कोही विकास बोर्डतर्फ खुलेका छन् भने कोही ‘प्रेमगीत ३’को पक्षमा उभिएका छन् । 

अभिनेत्री करिश्मा मानन्धर भने ‘प्रेमगीत ३’ तर्फ खुलेकी छन् । ‘कहिलेकाही नबोलु भन्दा पनि बोल्नुपर्ने रहेछ !’ भन्दै उनले फेसबुकमा लामो स्टाटस लेखेकी छन् । 

करिश्माले लेख्छिन, ‘सही बोल्दा खाएको गाली, हरेक विवादित विषय बोल्दा अमृत सरह मानेर सहेको छु । झन् विषय आफूलाई कर्ममा जन्मदिने क्षेत्र भएपछि बोल्नु अनिवार्य हुन्छ । समयले सत्य प्रमाणित गर्छ भन्ने राम्रोसँग थाहा छ । सन्दर्भ ‘प्रेम गीत ३’ । मेरो विचारमा यो चलचित्र कुनै भाषा त के ‘मुक’ चलचित्र भए पनि विवादरहीत भएर सबैको साथ र सहयोग पाउनुपर्थ्याे । यसै पनि नेपाली चलचित्र विश्व बजारसम्म नपुगेको वर्तमान अवस्थामा, नेपालीले नेपाली पैसा लगानी गरेको यो चलचित्र, नेपालकै सुन्दर दृश्यहरू समेटेको यो चलचित्र, नेपाल कै कथामा बनेको चलचित्र, नेपाली प्राविधिकहरूले काम गरेको, यो चलचित्रलाई विदेशी भूमिमा चलाउनकै लागि त्यो मुलुकको भाषामा स्वरांकित गर्‍यो त के नराम्रो भयो ?’ 

उनले प्रेमगीत ३ स्तरीय चलचित्र बनेको दाबी पनि गरेकी छन् । उनी अगाडि लेख्छन्, ‘ भाषा एउटा माध्यम हो तिनले हाम्रो भाषा बुझ्दैनन त्यसैले सो कार्य गरियो होला । ठीक छ तपाईंको विधानमा या नियममा तेस्तै प्रावधान होला, विदेशी भाषिक चलचित्रलाई निश्चित प्रतिशत कर लगाउने !!,  लगाउनुस तर, तेत्रो लगानी भएको चलचित्रलाई तोकेको समयमै चलचित्र हलमा लगाउनका लागि सघाउनु पर्दैन !!!’ 

उनले प्रश्न गर्दै थप लेखेकी छन्, ‘हिन्दी या विदेशी चलचित्र आउनासाथ सेन्सर गरेर देखाउन हतार गर्ने तर नेपाली लगानीमा बनेको नेपाली  चलचित्र विदेशी भाषामा स्वरांकन (डब) हुँदैमा किन यस्तो जटिल भएको ?’ 

हिन्दी संस्करण प्रदर्शनका लागि प्रेम गीत ३ टिमले नेपाली चलचित्रले झैं सेवा सुविधा पाउनुपर्ने माग विकास बोर्डसमक्ष गरेको थियो । तर, बोर्डले भने हिन्दी डब (संस्करण)को प्रतिलिपी बलिउड कम्पनीले किनेको हुँदा ‘विदेशी’ प्रक्रियाबाटै चलचित्र प्रदर्शनमा आउनुपर्ने बताएको छ । 

विदेशी चलचित्रले चलचित्र विकास करबापत १५ प्रतिशत शुल्क तिर्नुपर्छ । यता हलहरूले चलचित्रलाई रातिको शो राखेका छैनन् । यी कारणलाई लिएर ‘प्रेम गीत ३’ टिम रुष्ट छ । यो विवादलाई धेरैले ‘प्रेम गीत ३’ र विकास बोर्डबीचको विवादका रूपमा हेरेका छन् । कलाकारहरूले पनि आफ्नो धारणा सार्वजनिक गरिरहेका छन् ।