काठमाडौं गोठाटारमा सोमवार साँझ भएको गोलीकाण्डबारे छानबिन गर्न नेपाल प्रहरीले विशेष समिति गठन गरेको छ । नेपाल प्रहरीले उपत्यका अपराध अनुसन्धान कार्यालयका प्रमुख प्रहरी वरिष्ठ उपरीक्षक (एसएसपी) जनक  भट्टराई नेतृत्वमा पाँच सदस्यीय विशेष समिति गठन गरेको हो । 

समितिमा जिल्ला प्रहरी परिसर काठमाडौंका प्रवक्ता प्रहरी उपरीक्षक (एसएपी) दिनशराज मैनाली, उपत्यका अपराध अनुसन्धान कार्यालयमा कार्यरत प्रहरी नायब उपरीक्षक (डीएसपी) कृष्ण चन्द लगायत सदस्य छन् । समितिमा साइबर ब्यूरोका एकजना अधिकृतलाई पनि राखिएको छ । 

काठमाडौंको कागेश्वरी मनोहरा नगरपालिका–८ मा सोमवार राति अज्ञात समूहले सर्लाहीको हरिवन नगरपालिका–२ घर भएका लाला मोहम्मदलाई गोली प्रहार गरेको थियो । उनको उपचारका क्रममा मृत्यु भएको थियो । 

गोठाटारमा एजेन्जर इन्टरप्राइजेज वर्ड वेष्ट गार्मेन्ट सञ्चालन गर्दै आएका लाल मोहम्मदमाथि बेलुका आफ्नो गार्मेन्टको अगाडि गोली प्रहार भएको हो । टाउको २ वटा गोली, दायाँ हात र दायाँ गोडामा गोली लागेका उनको उपचारका लागि शिक्षण अस्पताल पुर्‍याउनेवित्तिकै मृत्यु भएको थियो ।