प्रदीप खड्का र क्रिष्टिना गुरुङको मुख्य भूमिका रहेको चलचित्र ‘प्रेमगीत ३’ आगामी शुक्रवारदेखि नेपाल, भारतसँगै विभिन्न देशमा एकसाथ प्रदर्शनमा आउने तयारीमा छ ।

हिन्दी भाषामा स्वरांकन भएर भारतका सयौं थिएटरमा एकसाथ प्रदर्शनमा आउन लागेको ‘प्रेमगीत ३’ सम्भवत पहिलो नेपाली चलचित्र हो ।

चलचित्र नेपालमा नेपालीसँगै हिन्दी भाषामा पनि प्रदर्शनको तयारीमा छ । यद्यपि हिन्दी भाषामा प्रदर्शनका लागि चलचित्र बुधवार दिउँसोसम्म सेन्सर हुन सकेको छैन । चलचित्र जाँच समितिका सदस्य सन्तोषकुमार थापाले नेपाली भर्जन केही दिनअघि नै सेन्सर भएपनि हिन्दी भर्जन सेन्सर हुन नसकेको बताए ।

‘हिन्दी भर्जनको सेन्सरका लागि अहिलेसम्म फोन, म्यासेज आएको छैन्,’ थापाले लोकान्तरसँग भने । निर्माण टीमले हिन्दी भर्जनले पनि नेपालीसरह सेवासुविधा पाउनुपर्ने माग गरेपछि विवाद शुरू भएको थियो । निर्माण टीमले सेन्सर सिफारिसका लागि विकास बोर्डमा निवेदन दिँदै चलचित्र नेपालीसरह प्रदर्शनमा आउने माहोल बनाउन माग गरेको थियो ।

यता विकास बोर्डले हिन्दी भर्जनलाई नेपाली चलचित्रसरह मान्न नसकिने र यदि हिन्दीमा रिलिज गर्ने हो भने विदेशी चलचित्र सरह प्रक्रियामा आउन अनुरोध गरेको थियो । चलचित्र निर्माता संघले पनि ‘प्रेम गीत ३’को हिन्दी भर्जनलाई विदेशी चलचित्रसरह कर लगाउनुपर्ने माग गरेको थियो । सरकारले विदेशी चलचित्रलाई विकास शुल्कका रूपमा १५ प्रतिशत कर लिँदै आएको छ । सोही विषयलाई लिएर यतिबेला चलचित्रकर्मीहरू समेत २ कित्तामा विभाजित भएका छन् ।

कोही चलचित्रकर्मी यसलाई नेपाली चलचित्रसरह कर छुट गर्नुपर्छ भन्ने पक्षमा छन् त कोही विपक्षमा छन् ।