नेपाल प्रहरीका पूर्वमहानिरीक्षक सर्वेन्द्र खनालले चुनावपछि केपी ओलीको नेतृत्वमा सरकार बन्ने र त्यसले नेपालीको शीर उँचो बनाउने दाबी गरेका छन् । उनले ओलीलाई फराकिलो छाति भएको नेताको रूपमा चित्रित गरे । 

बिहीवार ओलीबाट टिका लगाएर एमाले प्रवेश गरेको खनालले एमालेको पक्षमा चुनावमा भेल बाढी ल्याउने दाबी गरेका हुन् । ‘यति फराकिलो छाति भएको मान्छे उहाँ, अबको प्रधानमन्त्रीत्व कालमा नेपालीको शीर उँचो बनाउने कुरामा सबैको अहम् भूमिका जरुरी छ’, खनालले भने ।  

खनालले चुनावमा एमालेले दुई तिहाई ल्याएर सरकारको नेतृत्व गर्ने दाबी गरे । मन्तव्यको अधिकांश समय ओलीको प्रसंशामा खर्चेका खनालले भने, ‘धेरै छ मनभित्र, आजमात्र कति बोलौँ, आगामी दिनमा भन्दै जानेछु । यो देशको मुहार फेर्न, बाहिरले हेप्न नसक्ने, नीचको दृष्टिले हेर्न नपाउनको लागि उहाँको अभियानमा हामी सधैं सँगै हुनेछौँ ।’ 

प्रतिनिधि सभा निर्वाचनमा टिकट पाउने आश्वासनपछि चुनावको मुखमा खनाल एमाले प्रवेश गरेका हुन् ।