उपचारका लागि क्षयरोग निवारण संस्था विराटनगरमा भर्ना भएका दुई जना कैदीबन्दी फरार भएका छन् । कैदी राजकुमार हेमरम र बन्दी मञ्जील गुरुङ फरार भएका हुन् । 

क्षयरोग लागेपछि उनीहरूलाई भदौ र असारमा क्षयरोग निवारण संस्थामा ल्याएर उपचार थालिएको थियो । उपचारका क्रममा उनीहरू शनिवार बिहानदेखि फरार भएको जिल्ला कारागार मोरङका निमित्त जेलर तुलसीराम भगतले बताए । 

दुवै जना जिल्ला कारागार झापामा थिए । उनीहरूलाई क्षयरोग देखिएपछि विराटनगर ल्याइएको थियो ।

हेमरम जवरजस्तीकरणी मुद्दाका कैदी हुन् । उनलाई २०७५ सालमा १६ वर्ष कैद सजायको फैसला भएको थियो । गुरुङ भने लागुऔषध मुद्दामा पूर्पक्षका लगि थुनामा थिए । जिल्ला अदालत झापाले उनलाई २०७८ कात्तिक ५ गते पुर्पक्षका लागि थुनामा पठाएको थियो ।

विभागको निर्देशनपछि दुई जनालाई क्षयरोग निवारण संस्थामा राखेर उपचार गरिरहेको निमित्त जेलर भगतले बताए । 

उपचारका क्रममा फरार भएका कैदीबन्दीको खोजी भइरहेको जिल्ला प्रहरी कार्यालय मोरङले जनाएको छ । सुरक्षामा खटिएका प्रहरीमाथि पनि छानबिन भइरहेको मोरङका प्रहरी उपरीक्षक शान्तिराज कोइरालाले बताए ।