नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’का कान्छा ज्वाइँ जीवन आचार्यले प्रदेश सभाको टिकट पाएका छन् । उनले मोरङको निर्वाचन क्षेत्र ६(१) बाट प्रदेश सभाको उम्मेदवार बन्ने भएका छन् । प्रतिनिधि सभामा भने सो क्षेत्रबाट कांग्रेसका प्रभावशाली नेता डा. शेखर कोइरालाले टिकट पाएका छन् । 

आचार्य यसअघि २०७४ सालको निर्वाचनमा पनि सोही क्षेत्रबाट प्रदेश सभा सदस्यको उम्मेदवार बनेका थिए । वाम गठबन्धनको तर्फबाट उम्मेदवार बनेको उनी नेपाली कांग्रेसका चुमनारायण तबदारसँग पराजित भएका थिए । तबदारले २३ हजार ५१३ मत पाउँदा आचार्यले एमालेसमेतको समर्थनमा २१ हजार ४७० मत पाएका थिए । 

प्रदेश १ मा प्रतिनिधि सभातर्फ २८ सिटमध्ये ८ सिट माओवादी केन्द्रले पाएको छ । माओवादीले ताप्लेजुङमा खेलप्रसाद बुढा क्षेत्रीलाई उम्मेदवार बनाएको छ ।  बुढा क्षेत्रीको नेकपा एमालेका सचिव योगेश भट्टराईसँग प्रतिस्पर्धा हुने छ । 

झापा २ भने माओवादी केन्द्रले उम्मेदवारको टुंगो लगाएको छैन । नेकपा एमालेका प्रभावशाली नेतालाई भित्र्याएर सो क्षेत्रमा उम्मेदवार बनाउने तयारीमा माओवादी केन्द्र रहेको स्रोतको दाबी छ । सो क्षेत्रमा एमालेले पार्टीका प्रदेश इन्चार्ज देवराज घिमिरेलाई उम्मेदवार बनाएको छ ।

यता मोरङको क्षेत्र नं. ४ मा अमनलाल मोदी र ५ मा शिवकुमार मण्डल उम्मेदवार बनेका छन् । उनीहरू दुवै यसअघिको निर्वाचनमा वाम गठबन्धनका तर्फबाट सोही क्षेत्रबाट निर्वाचित भएका थिए । मोरङ क्षेत्र नं ४ मा एमालेका विनोद ढकाल र क्षेत्र नं.५ मा जसपाका राजकुमार यादव उम्मेदवार बनेका छन् । 

सुनसरीको क्षेत्र नं. १ मा माओवादीले मुक्साहाङ मेन्याङ्बोलाई उम्मेदवार बनाएको छ । सो क्षेत्रमा एमाले र जसपाको गठबन्धनबाट अशोक राई उम्मेदवार बन्दैछन् ।

भोजपुरमा माओवादीले निवर्तमान सांसद सुदन किराँतीलाई उम्मेदवार बनाएको छ । किराँतीको चुनावी भिडन्त भने पूर्वमुख्यमन्त्री शेरधन राईसँग हुने भएको छ । आफ्नो भागमा परेको खोटाङमा माओवादीले प्रदेशका बहालवाला मन्त्री रामकुमार राई वा केन्द्रीय सदस्य समिता कार्कीलाई उम्मेदवार बनाउने भन्ने निर्णय गरिसकेको छैन । माओवादीको भागमा परेको भनिएको सोलुखुम्बुमा भने कांग्रेसको दाबी कायमै रहेकाले अन्तिम टुंगो नलागेको बताइएको छ ।

यसैगरी प्रदेश सभातर्फ ५६ वटा सिटमध्ये माओवादीको भागमा १७ सिट परेको छ ।