राष्ट्रिय प्रजातन्त्र पार्टीका सहअध्यक्ष रवीन्द्र मिश्रले उम्मेदवारी दर्ता गर्नुअघि कालिकास्थान मन्दिरमा पूजा गरेका छन् । काठमाडौं क्षेत्र नम्बर १ बाट प्रतिनिधि सभातर्फ उम्मेदवारी दिन लागेका रवीन्द्रले बिहान आफ्नै निर्वाचन क्षेत्रमा रहेको प्रशिद्ध शक्तिपीठ कालिकास्थान मन्दिरमा पूजा गरेका हुन् । 

उनले आइतवार दिउँसो १ः३० बजे उम्मेदवारी दर्ता गर्ने तयारीमा छन् । रवीन्द्रले दिउँसो नयाँबानेश्वरस्थित अन्तर्राष्ट्रिय सम्मेलन केन्द्रमा पुगेर उम्मेदवारी मनोनयन गर्ने जानकारी दिएका छन् । उनले सामाजिक सञ्जालमा सन्देश लेख्दै उम्मेदवारी दर्ताबारे जानकारी दिएका हुन् । 

रवीन्द्रले ट्वीटरमा लेखेका छन्, ‘आज उम्मेदवारी दर्ता गर्नुअघि काठमाडौं क्षेत्र नं १ को प्रशिद्ध शक्तिपीठ, कालिकास्थान मन्दिरमा पूजा गर्दै आशिर्वाद लिइयो। अब १.३० बजे मनोनयन केन्द्र, वीरेन्द्र अन्तर्राष्ट्रिय सम्मेलन केन्द्र, नयाँ बानेश्वरमा उपस्थित हुनेछौँ ।’ 

हालै राप्रपा प्रवेश गरेको रवीन्द्रको चुनावी प्रतिष्पर्धा नेपाली कांग्रेसका नेता प्रकाशमान सिंहलगायतसँग हुने छ ।