वन तथा वातावरणमन्त्री प्रदीप यादवले पर्सा क्षेत्र नम्बर १ मा प्रतिनिधि सभा सदस्यको उम्मेदवारी दर्ता गराएका छन् । जनता समाजवादी पार्टी (जसपा)–एमाले गठबन्धनका साझा उम्मेदवार बनेका यादवले आइतवार दिउँसो वीरगञ्जस्थित मुख्य निर्वाचन अधिकृतको कार्यालयमा पुगेर प्रतिनिधि सभा सदस्यका लागि उम्मेदवारी दिएका हुन् ।

जसपाको केन्द्रीय राजनीतिक समिति सदस्यसमेत रहेका मन्त्री यादव २०७४ को निर्वाचनमा पर्सा १ बाटै प्रतिनिधिसभा सदस्यमा निर्वाचित भएका थिए । आइतवार मनोनयन दर्तापछि सञ्चारकर्मीसँग कुरा गर्दै यादवले पर्साका चारवटै प्रतिनिधि सभा र आठवटै प्रदेश सभा क्षेत्रमा जसपा–एमाले गठबन्धनका साझा उम्मेदवारहरूको जित सुनिश्चित रहेको दाबी गरे । 

यादवले यसै पनि पर्सा जिल्लामा जसपा बलियो अवस्थामा रहेको र त्यसमा एमालेसँग गठबन्धन गरिएकाले आफूहरुको जित कसैले रोक्न नसक्ने दाबी गरे । उनले पर्सा १ मा आफू पुनः प्रतिद्वन्द्वी भन्दा अत्याधिक मतले निर्वाचित हुने ठोकुवासमेत गरे ।