पाकिस्तानमा पहिलोपटक नेपाली फिल्म प्रदर्शन हुने भएको छ । फिल्म ‘प्रेम गीत–३’ लाई पाकिस्तानमा पनि प्रदर्शन गर्न लागिएको हो । 

गत असोज ७ गतेदेखि भारतसहित विश्वका ३ दर्जन देशमा एकसाथ प्रदर्शनमा आएको फिल्म अब पाकिस्तानमा पनि प्रदर्शनमा आउने भएको निर्माता एवं निर्देशक सन्तोष सेनले जानकारी दिए । उनका अनुसार आगामी कात्तिक १८ (नोभेम्बर ४) मा फिल्मलाई पाकिस्तानमा प्रदर्शन गर्ने तयारी गरिएको छ । 

उक्त मितिमा प्रदर्शन गर्ने तयारीस्वरुप फिल्मको सेन्सर पनि भइसकेको उनले बताए । पाकिस्तानमा उर्दू भाषामा डबिङ गरेर फिल्म प्रदर्शन गर्न लागिएको हो । ‘पाकिस्तान सेन्सरपछि सेन्सर प्रतिनिधिबाट पोस्ट मेन्सन् भयो’ सेन्सरका सदस्यले सामाजिक सञ्जालमा अमेजिङ एक्सन एन्ड म्युजिक भन्दै शुभकामना दिएको स्क्रिनसट फेसबुकमा शेयर गर्दै निर्माता एवं निर्देशक सन्तोष सेनले फेसबुकमा खुशी साटेका छन्, ‘हामी खुशी छौँ उर्दू भाषामा पहिलो पटक पाकिस्तानमा प्रदर्शन हुँदैछ । संसारले खुशी–खुशी नेपालको फिल्मलाई हेरेर आफ्नो–आफ्नो भाषामा प्रदर्शन गर्न उत्साहित छन् । तर, चिन्ता हाम्रो अभिभावक आसे पासेलाई छ ।’ 

‘प्रेम गीत–३’ले नेपाल, भारतलगायतका देशमा राम्रो व्यापार गरेको छ । भारतमा पहिलोपटक नेपाली फिल्म हिन्दीमा डबिङ गरेर थिएटर रिलिज गरिएको हो । सन्तोष सेन र छेतेन गुरुङको संयुक्त निर्देशन रहेको फिल्ममा प्रदीप खड्का, कृष्टिना गुरुङ, शिव श्रेष्ठ, मनिष राउतलगायत मुख्य भूमिकामा छन् । 

एकसमय अभिनेता शिव श्रेष्ठले पाकिस्तानमा समेत ‘सुपरस्टार’को छवि बनाएका थिए । पाँच वर्ष लामो करिअरमा उनले दुई दर्जन बढी उर्दू भाषाका फिल्ममा अभिनय गरे । त्यसअघि ७ फिल्महरु सुपरहिट भएका थिए । त्यहाँको चम्किलो करिअर छाडेर शिव नेपाली फिल्म ‘चिनो’ खेल्न नेपाल आइपुगेका थिए । झण्डै २४ वर्षपछि नेपाली फिल्म ‘प्रेमगीत ३’मार्फत पाकिस्तानमा शिवको कमब्याक हुन लागेको हो । उनका कारण पनि पाकिस्तानमा ‘प्रेमगीत ३’ले राम्रो रेस्पोन्स पाउने निर्माण टिमको विश्वास छ ।