नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आगामी चुनावमा २ वटा विचार, २ प्रवृत्ति र २ गठबन्धन चुनावी प्रतिस्पर्धामा रहेको बताएका छन् । उनले सही गठबन्धनलाई जनताले जिताउने बताए । 

ललितपुरमा आयोजित गठबन्धन दलका कार्यकर्तालाई सम्बोधन गर्न आयोजित कार्यक्रमलाई सम्बोधन गर्दै अग्रगमन र प्रतिगमणको राजनीतिक ब्याटल मंसिर ४ गतेको चुनाव भएको उनले बताए । 

नेकपा एमालेका अध्यक्ष केपी शर्मा ओलीलाई इंगित गर्दै प्रचण्डले ‘बयल गाडा’ प्रवृत्ति अत्यको लडाइँ पनि आगामी चुनाव भएको उनले बताए । १२ बुँदे सम्झौता र शान्ति सम्झौताको प्रसंग कोट्याउँदै उनले त्यसबेला आफूहरुले ‘बयल गाडा’ प्रवृत्तिलाई पराजित गरेर देश शान्तिपूर्ण बाटोमा आएको उनले बताए ।

‘एमाले र माओवादी केन्द्रको पार्टी एकता गर्दा गोरू बयल–गाडावाला सिद्धान्त भएकाहरू पनि बदलिए होलान् भन्ने लागेको थियो । तर, त्यो त धोका रहेछ’, प्रचण्डले भने, ‘बयल गाडा प्रवृत्ति भएकाहरू बयल गाडामा चढेर फेरि पनि देशलाई प्रतिक्रान्ति र अराजकतामा लैजाने प्रयासमा छन् ।’ 

‘नेपालमा सामन्तवादलाई नै स्थापित गर्ने प्रयास रहेका छन् । प्रतिगमनकारी र प्रतिक्रान्तिकारीले जित्ने कि हामीले जित्ने भन्ने फैसला मंसिर ४ गते हुँदै छ । राजावादीहरू, प्रतिगमनकारीहरूको गठबन्धन विपक्षीहरूले बनाएका छन्’, प्रचण्डले भने, ‘संविधान, लोकतन्त्रको रक्षा गर्ने पुनित उद्देश्यले गठबन्धन बनाएका हौँ । अझै पनि त्यो अप्राकृतिक, अपवित्र प्रवृत्तिको कसरत चलिरहेकै छ । जबसम्म प्रतिगमनको खतरा रहिरहन्छ त्यसबेलासम्म गठबन्धन बलियो भएर गइरहनुपर्छ ।’ 

माओवादीकै सहयोगमा कांग्रेस ठूलो पार्टी बनेको भन्दै उनले आगामी चुनावमा हँसिया हथौडाले रूखमा र रूख चिह्न भएकाले हँसिया हथौडामा मत हाल्न हिचकिचाउन नहुने उनले बताए । 

मंसिर ४ गतेपछि गठबन्धनकै सरकार बन्ने र त्यो सरकारको प्राथमिकता आर्थिक समृद्धि नै हुने उनले बताए । ‘आर्थिक समृद्धि नहुँदा राजनीतिक परिवर्तन स्थिर नहुने रहेछ । अबको सरकार गठबन्धनकै बन्छ । त्यो सरकारले आर्थिक विकासको नेतृत्व गर्छ’, उनले भने ।