सातै प्रदेशमा सीप विकास प्रतिष्ठान स्थापना गर्दै सरकार

श्रम, रोजगार तथा सामाजिक सुरक्षामन्त्री शेरबहादुर कुँवरले सरकारले मुलुकभित्रै दक्ष जनशक्ति उत्पादन गर्ने लक्ष्यकासाथ सीप विकास प्रतिष्ठान स्थापनाको प्रक्रिया अगाडी बढाएको बताएका छन् । मंगलवार काठमाडौंमा आयोजित एक कार्यक्रममा बोल्दै मन्त्री कुँवरले देशमा विद्यमान बेरोजगार युवा जनशक्तिहरूलाई श्रम बजार अनुकूलको ज्ञान र सीप प्रदान गरी रोजगारी र स्वरोजगारीका अवसरहरू सिर्जना गर्ने भन्दै श्रम, रोजगार तथा सामाजिक सुरक्षा मन्त्रालयले सातै प्रदेशमा सप विकास प्रतिष्ठान स्थापनाको प्रक्रिया अगाडि बढाएको बताए । 

उनले दक्ष जनशक्ति उत्पादन गर्नका लागि तयार पारिएको गठन आदेश मन्त्रीपरिषद्मा विचाराधीन अवस्थामा रहेको जानकारी दिए । गठन आदेश पारित भएसँगै सातै प्रदेशमा सीप विकास प्रतिष्ठान स्थापनाको प्रक्रिया अगाडि बढ्ने उनले बताए । 

‘सरकारले अहिले नीति के लिएको छ भने जतिसक्दो दक्ष जनशक्ति उत्पादन गर्ने, चाहे स्वदेशमा होस्, चाहे वैदेशिक रोजगारीमा पठाउँदा होस्, हामीले दक्ष जनशक्ति उत्पादन गर्नको लागि हामीले सीप विकास प्रतिष्ठान बनाउने प्रक्रिया अघि बढाएका छौँ । त्यसको लागि गठन आदेश मन्त्रीपरिषद्मा अहिले विचाराधीन छ । त्यो पारित हुने बित्तिकै सातै प्रदेशमा हामीले सीप विकास प्रतिष्ठानलाई लैजानेछौँ । ताकी विदेश जाने श्रमिकहरु सीप सिकेर जाऔँ, असुरक्षित नहोउन्’, मन्त्री कुँवरले भने । 

मन्त्री कुँवरले अनौपचारिक क्षेत्र र वैदेशिक रोजगारीमा रहेका श्रमिकहरूलाई सामाजिक सुरक्षा कोषअन्तर्गत ल्याउने अन्तिम तयारी भएको पनि जानकारी दिए । उनले अनौपचारिक क्षेत्र र वैदेशिक रोजगारीमा रहेका श्रमिकहरूलाई कोषअन्तर्गत ल्याउने गरी दुईवटा कार्यविधि तयारी भई छलफलको क्रममा रहेको र केही समय भित्रै कार्यान्वयनमा आउने बताए । 

‘अहिले हामीले फेरि अनौपचारिक क्षेत्रमा रहेका श्रमिकहरूलाई र विदेशमा रहेका श्रमिकहरूलाई सामाजिक सुरक्षा कोषअन्तर्गत ल्याउनको लागि, समावेश गर्नको लागि दुई वटा कार्यविधि अघि बढाएका छौँ । एउटा कार्यदल बनाएर अनौपचारिक क्षेत्रमा कति श्रमिक हुनुहुन्छ र उहाँहरुलाई कसरी सामाजिक जोड्ने भनेर छलफल गरिरहेको छौँ’, उनले भने ।  

मन्त्री कुँवरले जर्मनसँग श्रम सम्झौता गर्ने तयारी अवस्थामा रहेको पनि जानकारी दिए । उनले नेपालका श्रमिकहरूले सम्मानजनक पारिश्रमिक पाउन भन्नका लागि जर्मन, बेलायत, हंगेरीलगायतका देशसँग श्रम सम्झौता गर्ने तयारी गरेका बताए ।