बागी उम्मेदवारी दिएकालाई जसपाले गर्‍यो कारबाही

जनता समाजवादी पार्टी (जसपा)ले बागी उम्मेदवारी दिएका नेताहरूलाई कारबाही गरेको हो । जसपाले बिहीवार विज्ञप्ति जारी गर्दै पार्टीको निर्णयविपरीत बागी उम्मेदवारी दिएकालाई कारबाही गरेको जानकारी दिएको छ । 

आगामी मंसिर ४ गते हुने प्रतिनिधि सभा र प्रदेश सभा निर्वाचनमा जसपाले केही जिल्लामा नेकपा एमालेसँग तालमेल गरेको छ । एमालेसँग तालमेल गरिएका केही निर्वाचन क्षेत्रमा बागी उम्मेदवारी परेको र उक्त उम्मेदवारी फिर्ताका लागि दिइएको निर्देशनको पालना नगरेकाले कारबाही गरिएको विज्ञप्तिमा उल्लेख छ । पार्टीको निर्देशनविपरीत बागी उम्मेदवारी कायम राखेका उम्मेदवारलाई पार्टीबाट निस्कासन गरिएको जसपा कार्यलय प्रमुख प्रकाश अधिकारीले जानकारी दिए ।