नेपाली कांग्रेसका नेता तथा काठमाडौं–५ का प्रतिनिधि सभा सदस्य उम्मेदवार प्रदीप पौडेल मत माग्ने क्रममा वैकल्पिक राजनीतिको शुरुवात गर्ने दिवंगत नेता उज्जवल थापाको निवास पुगेका छन् । उनी घरदैलो अभियानअन्तर्गत शनिवार चप्पल कारखानास्थित थापाको निवास पुगेका हुन् । पौडेलले थापाका माता–पितासँग भेट गरेर आशिर्वाद लिएका छन् । 

उनले थापाले लिएको वैकल्पिक राजनीतिको एजेन्डालाई आफूले अगाडि बढाउने प्रतिवद्धता जनाएका छन् । सो क्रममा थापाकी माता शान्ताले नेता पौडेललाई जीतको शुभकामना दिएकी थिइन् । पौडेलले यसअघि चर्चित अभिनेता हरिवंश आचार्यको बूढानीलकण्ठस्थित निवास पुगेर आशिर्वाद लिएका थिए । कात्तिक २ गते मत माग्दै पुगेका पौडेललाई कलाकार आचार्यले सफलताको शुभकामना दिएका थिए । 

पौडेलले असोज २४ गतेबाट काठमाडौं महानगरपालिका–५ हाँडीगाउँबाट घरदैलो शुरु गरेका हुन् । पहिलो दिनको घरदैलो अभियानका क्रममा उनको हाँडीगाउँ जात्रामा सहभागी हुन पुगेका काठमाडौं महानगरपालिकाका मेयर बालेन्द्र शाह र उपमेयर सुनिता डंगोलसँग भेट भएको थियो ।

काठमाडौं महानगरपालिकाका २, ३, ४ र ५, बूढानीलकण्ठ नगरपालिकाका ३, ४, ५, ६, ७ र टोखा नगरपालिकाका २, ३, ४, ५, ६, ७ नम्बर वडाहरूको भूगोल समेटेर काठमाडौं–५ निर्धारण गरिएको छ । 

यो क्षेत्रबाट नेकपा एमालेका वरिष्ठ उपाध्यक्ष ईश्वर पोखरेल चुनाव लड्दै छन् । त्यस्तै स्वतन्त्र उम्मेदवार रञ्जु दर्शना पनि चुनावी मैदानमा छिन् । 

२०७४ को निर्वाचनमा काठमाडौं–५ मा कांग्रेस प्रवक्ता डा. प्रकाशशरण महतलाई पराजित गर्दै एमालेका पोखरेल प्रतिनिधि सभा सदस्यमा निर्वाचित भएका थिए । उनले कुल खसेको मतमध्ये २३ हजार २९ मत र डा महतले १३ हजार १६९ मत प्राप्त गरेका थिए ।