नेकपा एमालेका उपाध्यक्ष तथा पूर्व अर्थमन्त्री विष्णु पौडेलले पूर्वाधार विकासको क्षेत्रमा बुटवलले असाधारण फड्को मार्ने दाबी गरेका छन् ।

रुपन्देहीमा शुरू गरिएका विकास आयोजनाहरू सम्पन्न हुँदा नमूना जिल्ला बन्ने उनले दाबी गरे ।

बुटवल–११ प्रगतिनगरमा बुधवार आयोजित कार्यक्रममा बोल्दै पौडेलले विकासका काममा राजनीतिक रंग नदिन र शुरू गरिएका पूर्वाधारका काम सम्पन्न गर्न सघाउन सबैलाई आग्रह गरे ।

नागरिकको जीवनस्तर माथि उकास्ने पहिलो खुड्किलो भौतिक विकास नै भएको उल्लेख गर्दै उनले भौतिक विकास सँगसँगै अब शिक्षा, स्वास्थ्य र अन्य रोजगारी सिर्जना गर्ने काममा लाग्ने बताए ।

रूपन्देही–२ बाट प्रतिनिधिसभा सदस्य पदका उम्मेदवार समेत रहेका पौडेलले अन्तर्राष्ट्रिय स्तरको सभाहल र बेलहिया बुटवल–६ लेन सडक निर्माण सम्पन्न भइसकेको र तिनाउ–दानव करिडोर निर्माण भएपछि बुटवल नमूना शहरको रूपमा विकास हुने बताए ।