राष्ट्रिय क्रिकेट टीमका पूर्वकप्तान सन्दीप लामिछानेलाई केन्द्रीय कारागार सुन्धारा पुर्‍याइएको छ ।

नाबालिक बलात्कारको अभियोग लागेका सन्दीपलाई पुर्पक्षका लागि थुनामा राख्न काठमाडौं जिल्ला अदालतले शुक्रवार आदेश दिएपछि केन्द्रीय कारागार पुर्‍याइएको हो ।

शुरूमा थुनछेक बहसका लागि काठमाडौं जिल्ला अदालत पुर्‍याइएका सन्दीपलाई प्रहरीको भ्यानमा राखेर केन्द्रीय कारागार लगिएको हो ।

अब मुद्दाको अन्तिम टुंगो नलाग्दासम्म सन्दीप कारागारमै रहनेछन् । यद्यपि माथिल्लो अदालत (उच्च अदालत, पाटन) पुनरावेदन दिन सक्ने विकल्प उनीसँग बाँकी छ ।

१७ वर्षीय किशोरीलाई काठमाडौंको एक होटलमा लगेर बलात्कार गरेको अभियोग सन्दीपमाथि छ । ती किशोरीका दाइले किटानी जाहेरी दिएका छन् ।

सन्दीपका तर्फबाट बहस गरेका वकिलहरूले राति सँगै बसे पनि करणी नगरेको जिकिर गरेका थिए ।

साथै, पीडित भनिएकी किशोरीको नागरिकता र जन्म दर्तामा फरक-फरक जन्ममिति देखिएकाले उनी  नाबालिक नभएको जिकिर समेत उनीहरूको थियो ।

सरकारी पक्षले भने प्रमाणका रूपमा सन्दीप र ती युवती होटलमा पुगेको सीसीटीभी फूटेज, युवतीको बयान आदि पेश गरेको छ ।