चितवन पुगेर कलाकरत्रय दिपाश्री निरौला, किरण केसी र निर्मल शर्माले मतदातालाई घण्टीमा मतदान गर्न आग्रह गरेका छन् । स्वतन्त्र पार्टीको चुनावी सभामा पुगेर उनीहरूले मत मागेका हुन् । 

कलाकार तथा निर्देशक निरौलाले अबको आवश्यकता रवि लामिछानेको रहेको दाबी गर्दै अत्यधिक मतले विजय गराउन  घण्टीमा मतदान गर्नुपर्ने बताइन् । राष्ट्रिय स्वतन्त्र पार्टीले चितवनमा आयोजना गरेको सभाको सम्बोधन गर्दै उनले भनिन्,'रवि हाम्रो मान्छे पनि हो, राम्रो मान्छे पनि हो, मन्दिरमा पुगेर हामीलाई रक्षा गर्नुस् ।'

चुनावी सभालाई सम्बोधन गर्ने क्रममा चलचित्र हवल्दार सुन्दरीको 'घण्टी बज्यो मनको' गीत गाउदै लामिछानेको प्रशंसामात्र गरेनन्, आफूसमेत आइसकेको बताइन् । उनले थपिन्,'हामी पनि आएका छौं, चितवनवासी तपाईंको हो, हामी पनि तपाईंको हो ।'

त्यस्तै, कलाकार किरण केसी 'राता मकै'ले रवि लामिछाने भिजन भएको र आँटिलो मान्छे भएकोले आफू समर्थनको लागि चितवन आएको बताएका छन् । रवि लामिछाने देशमा केही गरौ भनेर लागेकाले उनको सपना साकार पार्नको लागि उनलाई विजय गराउनुपर्ने बताएका हुन् । उनले चुनावी सभालाई सम्बोधन गर्दै ऐतिहासिक मत दिएर लामिछाने र उनको पार्टीलाई विजय गराउन सबै मतदातासँग आग्रह गरेका छन् । 
 
अर्का कलाकार निर्मल शर्माले राष्ट्रिय स्वतन्त्र पार्टीले मात्र देशलाई समृद्धिमा लैजान सक्ने दावी गरेका छन् । उनले राष्ट्रिय स्वतन्त्र पार्टीले राम्रो गर्छ भन्ने विश्वासले जीवनमा पहिलो पटक भोट मागेको भन्दै भावी सन्ततिलाई विकसित नेपालको किस्सा सुनाउने हो भने हामी यसको हिस्सेदार हुनुपर्ने बताएका छन् ।