विवाहको सिजन शुरु भएको छ । अहिले दिनहुँजसो विवाह समारोह भइरहेका छन् । पछिल्लो समय विवाहमा विदेशी प्रभाव देखिने गरेको छ । जसका कारण एकदमै महँगो भएको छ, विवाह । 

हास्य टेलिसिरियल ‘सक्किगोनि’ले भने विवाहमा देखिने गरेको तामझाम र विदेशी शैलीलाई कटाक्ष गर्दै एपिसोड तयार पारेको छ । बिहीवार प्रशारणमा आएको ‘सक्किगोनि’को एपिसोड ९६ मा विवाहमा हुने विदेशी शैली देखाउँदै अन्तिममा सन्देश प्रवाह गरिएको छ । 

विदेशी आयातित संस्कृतिले नेपाली संस्कृतिको परम्परा, सभ्यता र संस्कृति हराउँदै गएको भन्दै नेपाली संस्कृतिको संरक्षण गर्नुपर्छ भन्ने सन्देश टेलिसिरियलमा प्रस्तुत गरिएको छ । उक्त एपिसोडलाई धेरै कलाकारहरुले सन्देशमूलक भनेर आफ्नो फेसबुक वालमा शेयरसमेत गरेका छन् । 

अर्जुन घिमिरे र कुमार कट्टेलको लेखन एवं निर्देशनमा तयार हुँदै आएको ‘सक्किगोनि’मा समसामयिक विषयवस्तु समेट्दै आइएको छ । चुनावको समयमा चुनावको कथावस्तुमा केन्द्रित रहेर टेलिसिरियल निर्माण गरिएको थियो । टेलिसिरियलको यसअघिको एपिसोड विश्वकपमा आधारित रहेर निर्माण गरिएको थियो ।