राष्ट्रिय प्रजातन्त्र पार्टीका सांसद पशुपतिशम्शेर राणाले मुलुकका लागि आफूले अझै धेरै काम गर्न बाँकी रहेकाले सांसद बनेको प्रतिक्रिया दिएका छन् । आइतवार निर्वाचन आयोगमा पुगेर समानुपातिक सांसद पदमा निर्वाचित भएको प्रमाणपत्र ग्रहण गरेपछि लोकान्तरलाई प्रतिक्रिया दिँदै आफूले मुलुकका लागि गर्नुपर्ने काम धेरै बाँकी रहेको बताएका हुन् । 

आफू आफ्नो पिताको प्रेरणाबाट राजनीतिमा आएको भन्दै पिताले पूरा गर्न नसकेका धेरै सपना आफूले आफ्नो जीवनकालमा पूरा गर्ने भनेर बसिरहेको बताए । यद्यपि, आफ्नो पार्टी सरकारमा सहभागी भने नहुने राणाको भनाइ थियो । 

‘तपाईंको पार्टी सरकारमा सहभागी हुन्छ ?’ भन्ने लोकान्तरकोप्रश्नमा राणाले भने, ‘हामी जाने भनेको खबरदारी गर्न हो । जनताले हामीलाई सरकारमा जानु भनेको छैन । त्यसैले हामी संसदमा गएर मुलुकमा धेरै घुसखोरी भयो, अव्यवस्था भयो, ठूला पार्टीहरूले मनपरी गरे, अब ब्युँझ, इमान्दार भएर सोच, काम गरेनौँ भने राप्रपाले चुनौती दिन्छ भन्छौँ ।’ 

सांसद राणाले राप्रपासँग मुलुक निर्माणको धेरै एजेण्डा रहेको पनि दाबी गरेका छन् । उनले नेपाल दुई वटा ठूला मुलुकको बीचमा रहँदा आफ्नो राष्ट्रिय एजेण्डामा अडिग रहन नसकेको भन्दै गुनासो गरे । उनले अब राप्रपाले ठूला पार्टीलाई मुलुक बर्बाद मात्र पारेर नबस भनेर निरन्तर खबरदारी गर्ने बताए । ‘हामी आएकै प्रोटेष्ट गर्न हो । हामी जनताको आवाज त्यहाँ पुर्‍याउन गएको हो । हामीसँग सत्ताको लोभ छैन’, राणाले भने ।