देउवाको उम्मेदवारीबारे प्रकाशशरणको तर्क : राजनीति आयुले होइन, आवश्यक्ताको सिद्धान्तले चल्छ

नेपाली कांग्रेसका प्रवक्ता डा. प्रकाशशरण महतले राजनीति आवश्यक्ताको सिद्धान्तले चल्ने बताएका छन् । मंगलवार दिउँसो कांग्रेस संसदीय दलको कार्यालय सिंहदरबारमा देउवाको समर्थनमा पुगेका उनले राजनीति आयुको सिद्धान्तबाट नभई आवश्यक्ताको सिद्धान्तले चल्ने भएकाले अहिलेको आवश्यक्ता शेरबहादुर देउवा संसदीय दलको नेतामा चयन हुनु रहेको बताए । 

प्रवक्ता महतले कुनै पनि दलले बहुमत नल्याएको अवस्थामा परिपक्व नेतृत्वको आवश्यक्ता रहेको बताए । उनले देशले खोजेको नेतृत्व कांग्रेसले प्रस्तुत गर्ने भन्दै अहिले देशले प्रधानमन्त्री शेरबहादुर देउवालाई नै चाहेको बताए । उनले अन्य दलहरूसँग मिलेर सरकार बनाउनुपर्ने आवश्यक्ता भएकाले त्यो गुण, कला र अनुभव देउवासँग मात्रै रहेको दाबी गरे । 

‘राजनीति आवश्यक्ताको सिद्धान्तले चल्छ, आयुको सिद्धान्तमा चल्दैन । कोही बारम्बार हुन्छन् कोही हुँदै–हुँदैनन् । परिपक्व नेतृत्वको आवश्यक्ता छ । देशले खोजेको नेतृत्व हामीले प्रस्तुत गर्ने हो’, प्रवक्ता महतले भने, ‘कांग्रेसको मात्रै बहुमत छैन, हामीले अन्य दलहरुलाई पनि जोडेर सरकार बनाउनु छ । त्यो जोड्ने गुण उहाँमा छ, उहाँ पटक–पटक त्यसै हुनुभएको होइन ।’

नेपाली कांग्रेस संसदीय दलको नेताका लागि पार्टी सभापति एवं प्रधानमन्त्री शेरबहादुर देउवा र महामन्त्री गगनकुमार थापाले उम्मेदवारी दर्ता गराएका छन् । देउवाको प्रस्तावकमा पार्टीका वरिष्ठ नेता रामचन्द्र पौडेल छन् भने समर्थकमा उपसभापति पूर्णबहादुर खड्का छन् । 

महामन्त्री गगनको प्रस्तावकमा भने डा. शेखर कोइराला छन् । समर्थकमा उपसभापति धनराज गुरुङ, महामन्त्री विश्वप्रकाश शर्मा र नेता प्रदीप पौडेल छन् ।