राष्ट्रिय प्रजातन्त्र पार्टीका अध्यक्ष राजेन्द्र लिङदेनले अन्य राजनीतिक दलहरूभन्दा फरक ढंगले संसदमा देश र जनताको पक्षमा आवाज उठाउने बताएका छन् । बिहीवार सांसद पदको शपथ लिएपछि पत्रकारहरूसँग कुरा गर्दै आफूहरूले हिजोको भन्दा अझ सशक्त ढंगले आवाज उठाउने बताए । 

२०७४ सालमा राप्रपाका तर्फबाट लिङदेन एक्लै संसदमा थिए । उनी झापा ३ बाट प्रत्यक्षतर्फ निर्वाचन जितेर संसदमा पुगे पनि उनको पार्टीले राष्ट्रिय दलको मान्यता पाउन सकेको थिएन । यसपटक भने राप्रपाबाट ७ जना प्रत्यक्ष र ७ जना समानुपातिक गरी १४ जना सांसद भएका छन् । 

यसअघि संसद्को अन्तिम बैठकमा लिङदेनले आफू संसद्मा एक्लै नफर्किने, टिम लिएर फर्किने अभिव्यक्ति दिएका थिए । सोही सन्दर्भमा लोकान्तरले गरेको प्रश्नमा लिङदेनले भने, ‘टिम अझै पुग्ने गरी भएन, भनेजस्तो भएन ।  तर, हिजोको भन्दा अझ सशक्त ढंगले आवाज उठाउने संख्या भने भएको छ । अब देश र जनताको पक्षमा फरक पर्ने गरी काम गर्छौँ । अरुको भन्दा फरक ढंगले काम गर्छौँ ।’

लिङदेनले संसदमा आफ्नो पार्टीका निर्धारित राजनीतिक एजेण्डाका साथै सुशासनका मुद्दाहरू, विकासका मुद्दाहरू, सेवा प्रवाहका मुद्दा, राष्ट्रियताका मुद्दाहरू संसदमा उठाउने प्रष्ट पारे । 

उनले सरकार गठनको छलफलमा आफूहरू सहभागी नभएको र आफूहरूको प्राथमिकता पनि नरहेको प्रष्ट पारे । ‘सरकार गठनको छलफलमा हामी सहभागी भएका छैनौँ, हाम्रो प्राथमिकतामा पनि पर्दैन । प्रमुख राजनीतिक दलहरूले मिलेर सरकार गठन गरे राम्रो भन्ने हाम्रो मान्यता हो’, उनले भने, ‘हाम्रो आवश्यकता भयो भने त्यहीबेलामा छलफल हुन्छ ।’