राष्ट्रपति कार्यालय शीतलनिवासमा प्रधानमन्त्रीको शपथ ग्रहणको तयारी शुरु भएको छ । आइतवार राष्ट्रपति विद्यादेवी भण्डारीले नेकपा माओवादी केन्द्रका अध्यक्ष पुष्पकमल दाहाल प्रचण्डलाई प्रधानमन्त्री पदमा नियुक्त गरेकी थिइन् । प्रचण्डले सोमवार अपराह्न ४ बजे शपथ ग्रहण गर्ने कार्यक्रम छ । 

शपथ ग्रहणमा सहभागी हुन विशिष्ट व्यक्तित्वहरू पुग्ने क्रम शुरु भएको छ । नेकपा एमालेका अध्यक्ष केपी ओली, पूर्वसभामुखहरू अग्निप्रसाद तिम्सिना, सुवासचन्द्र नेम्वाङलगायतका नेताहरू शीतलनिवास पुगिसकेका छन् । 

आज प्रचण्डसहित एमालेबाट विष्णु पौडेल, दामोदर भण्डारी, ज्वालाकुमारी साह, राजेन्द्र राई, माओवादी केन्द्रबाट नारायणकाजी श्रेष्ठ, जनमत पार्टीका अब्दुल खान र राष्ट्रिय स्वतन्त्र पार्टीबाट रवि लामिछानेले मन्त्री पदको शपथ लिँदैछन् ।