प्रदेश १ प्रमुख पर्शुराम खापुङले आह्वान गरेसँगै सरकार गठनको बाटो खुलेको छ । आइतवार प्रदेश प्रमुख खापुङले संविधानको धारा १६८ को उपधारा (२) बमोजिम प्रदेश सरकार गठन गर्न आह्वान गरे । 

सरकार गठनको प्रयास शुरु भएसँगै चौँथो मुख्यमन्त्रीका लागि नेकपा एमाले र नेकपा माओवादी केन्द्रले दाबी प्रस्तुत गरेका छन् । संघीय सरकारमा एमाले र माओवादी केन्द्रलगायतको गठबन्धन बनेपछि प्रदेश सरकारमा दुवै दलले दाबी गरेका हुन् । 

केन्द्रमा बनेको गठबन्धनकै आधारमा सरकार बनाउने बताएका दुई दलले मुख्यमन्त्रीमा आ–आफ्नो दाबी रहेको बताएका छन् । पहिलो कार्यकालमा एमालेलाई सघाएको भन्दै माओवादी केन्द्रले यो कार्यकालमा आफूहरूले मुख्यमन्त्री पाउनुपर्ने बताएको छ । 

‘पहिलो कार्यकालमा हामीले एमालेलाई सघाएका थियाैँ’, नेकपा माओवादी केन्द्रका संसदीय दलका नेता इन्द्रबहादुर आङबोले भने, ‘यसपटक हामीलाई एमालेले सघाउनु पर्छ भन्ने हो ।’ आ–आफ्नो पार्टी नेताहरूसँग छलफल भइरहेको जानकारी दिँदै उनले केन्द्रीय गठबन्धनको निर्णय पर्खिरहेका बताएका छन् । केन्द्रमा नेताहरूबीच बन्ने सहमतिविपरीत भने नजाने आङ्बोले स्पष्ट पारे । उनले एमालेको दाबीलाई स्वभाविक रुपमा लिएको समेत बताएका छन् । 

एमालेले पनि प्रदेश १ सरकार आफ्नै नेतृत्वमा बनाउने अडान छाडेको छैन । प्रदेशसभाको ठूलो तथा सत्ता गठबन्धनको पनि ठूलो दलको हैसियतले आफ्नै नेतृत्वमा सरकार बन्नेमा एमाले नेताहरू ढुक्क देखिन्छन् । 

‘पहिला एमालेसँग बहुमत थियो र हामीले दाबी गरेका थियौँ’, नेकपा एमाले संसदीय दलका नेता हिक्मतबहादुर कार्कीले भने, ‘अहिले कसैसँग बहुमत नभएकाले केन्द्रको निर्णय पर्खनुको विकल्प छैन ।’ उनले एमाले ठूलो पाटी भएकाले सरकारको दाबी रहने प्रष्ट पारे । 

नेता कार्कीले नेकपा एकीकृत समाजवादीसहितको प्रदेश सरकार बन्नेसमेत बताएका छन् । उनले कांग्रेसलाई पनि सरकारमा सहभागी हुन अनुरोध गरेका छन् । ‘प्रदेशको संरचना बलियो बनाउनु पर्ने अवस्था रहेकाले सबै मिलेर सहमतिको सरकार बनाउनका लागि कांग्रेसलाई पनि सरकारमा सहभागी हुन अनुरोध गर्छु’, उनले भने । 

प्रदेश १ मा अहिलेको सत्ता गठबन्धनलाई सरकार बनाउन सहजै बहुमत पुग्ने अवस्था छ । प्रदेश १ मा एमाले ४० सिटसहित पहिलो पार्टी बनेको छ । यस्तै प्रदेशको तेस्रो पाटी बनेको माओवादी केन्द्रसँग १३ सांसद छन् भने राप्रपाका ६ र जसपाका १ सांसद रहेका छन् । 

अहिलेको सत्ता गठबन्धनमा ६० सांसद पुग्छ । सरकार बनाउने समय सम्ममा ४ सांसद थपिन सक्ने बताइन्छ । नेकपा एस पनि सरकारमा सहभागी भएमा उनीहरूका ४ सांसद सत्तापक्षमा थपिनेछन् । यद्यपि, नेकपा एसले सरकारमा सहभागी हुने वा नहुनेबारेमा निर्णय गरिसकेको छैन । 

कुल ९३ सासद भएकाले सरकार बनाउन भने ४७ सांसदको आवश्यक्ता पर्छ । नेकपा एस सरकारमा सामेल नभएको अवस्थामा प्रदेशसभाको विपक्षी बेञ्चमा ३३ सांसद हुनेछन् । 

यसअघि अघिल्लो कार्यकालमा प्रदेश १ मा तीनजना मुख्यमन्त्री बनिसकेका छन् । एमालेका शेरधन राई, भीम आचार्य र नेकपा एसका राजेन्द्र राई मुख्यमन्त्री बनेका थिए ।